भांगरभूंय | प्रतिनिधी
भारताच्या क्रिकेट पंगडाचो अश्टतासांचो खेळगडो केदार जाधवान क्रिकेटीच्या सगल्या फॉर्मेटांतल्यान निवृत्त जाल्ल्याची घोशणा केली. सोशल मिडियाच्या माध्यमातल्यान ताणें ही म्हायती दिली. 39 वर्सां पिरायेच्या केदार 8 फेब्रुवारी 2020त न्युझिलॅण्डा आड आपली निमाणी आंतरराष्ट्रीय मॅच खेळिल्लो.
केदारान 2014च आंतरराष्ट्रीय क्रिकेटींत पदार्पण केल्लें. तो 16 नोव्हेंबर 2014त रांची शारांत श्रीलंके आड पयली वन डे मॅच खेळिल्लो. 73 वन डे मॅचींनी खेळटना जाधवान 42.09चे सरासरीन 1389 धांवड्यो केल्ल्यो. हातूंत दोन शेंकडे आनी स अर्द शेंकड्यांचो आस्पाव आशिल्लो. तशेंच ताणें 27 विकेटी लेगीत घेतल्यात. तशेंच 9 आंतरराष्ट्रीय टी-20 मॅचींनी खेळटना 123.23चे स्ट्रायक रेटीन 58 धांवड्यो केल्यात.
देशांतर्गत क्रिकेटींत महाराष्ट्राचे प्रतिनिधित्व करपी जाधवान लिस्ट ए कारकिर्दींत 186 मॅचींनी खेळटना 159 डावांनी सुमार 46चे सरासरीन 5520 धांवड्यो केल्यात. हातूंत 10 शेंकडे आनी 33 अर्द शेंकड्यांचो आस्पाव आसा.
केदारान 2010त आयपीएलांत पदार्पण केल्लें. आयपीएलांत तो 93 मॅची खेळ्ळा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
