भांगरभूंय | प्रतिनिधी
डेहराडून, खबरां संस्था: उत्तराखंडांतूय पावसाचेर सांवार आयला. केदारनाथाचेर परत एक फावट संकश्ट कोसळ्ळा. केदारनाथाक वचपी मार्गार लिनचोली लागसार ढगफुटीची घडणूक घडल्या. ढगफुटीक लागून कांय खिणांतूच मंदाकिनी न्हंयेच्या उदकाची पातळी वाडल्या. व्हाळ भरून व्हांवपाक लागल्यात. जायते कडेन उदक सांठून उरला. मात आजून मेरेन कोणाक कांय जावंक ना अशी म्हायती मुखार आयल्या. केदारनाथाक वचपी पदयात्रा विस्कळीत जाल्या. पदयात्रेच्या मार्गारूच ढगफुटी जाल्ल्यान ५० ते २०० यात्रेकरु आडकून उरिल्यात.
हे पदयात्रेचो मार्ग आशिल्ल्या वाठारांत पालसणां कोसळिल्ल्यान रस्त्याचो ३० मिटराचो भाग कोसळ्ळा. केदारनाथाक वचपी पांय वाटेरूच पालसणां कोसळिल्ल्यान हांगच्यान यो- वच करप पुरायेन बंद जालां.थळाव्या प्रशासनान मजती खातीर एक मजत पंगड घडणुके सुवातेर धाडला.
केदारनाथांत काल रातभर सुरू आशिल्ल्या पावसाक लागून लिनचोली आनी महाबली वाठारांत पालसणां कसोळ्ळीं. मंदाकिनी न्हंयेंत व्हड खडपां कोसळिल्ल्यान ही न्हंय आतां व्हाळा येदी जाल्या. गौरकुंडांतलें गरम उदकाचें कुंड व्हांवून गेलां. रातचे गौरीकुंड आनी सोनप्रयाग वाठारांतले लोक आड्ड्यो मारीत धांविल्ल्याचें कळ्ळां.
लोकांक वाटावपाक सुरवात
मुख्यमंत्री पुष्कर सिंह धामी हांणी आपत्ती आनी पुनर्वसन विभागाच्या सचिवांक फोन करून घडणुको घडिल्ल्या वाठारांनी मजत कार्य सुरू करपाचे आदेश दिल्यात. तशेंच हेर संबंदीत विभागांतल्या अधिकार्यांक २४ वरां अलर्ट रावपाचे निर्देश दिल्यात.
मजगतीं, केदारनाथ पदयात्रा जायते कडेन बंद आसा. पावसाक लागून जायत्या वाठारांचो संपर्क तुटला. संपर्काचे मार्ग बंद आसात. प्रशासनान नागरिकांक सादूर रावपची शिटकावणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
