भांगरभूंय | प्रतिनिधी
डेहराडून, खबरां संस्था: आयतारा सकाळीं सुमार ५:२० वरांचेर केदारनाथ लागसारा गौरीकूंड हांगा एक हॅलिकॉप्टर कोसळ्ळें. हातूंत पायलट सयत सगल्या ७ प्रवाशांक मरण आयलें. मरण आयिल्ल्यां मदीं एका २ वर्सांच्या भुरग्यांचोय आसपाव आसा.
हें हॅलिकॉप्टर केदारनाथ देवळांतल्यान गौरीकुंडाक भाविकांक घेवन गेल्लें.
मुळावे म्हायती प्रमाण, वायट हवामानाक लागून हो अपघात जालो. हें हॅलिकॉप्टर आर्यन एव्हिएशन कंपनीचें आसा.
उत्तराखंड नागरी विमान येरादारी विकास प्राधिकरण (UCADA) प्रमाण, हॅलिकॉप्टरांत उत्तर प्रदेश-महाराष्ट्रांतल्या दरेकी २ आनी उत्तराखंड, राजस्थान, गुजरातांतलो दरेकी १ प्रवासी आशिल्लो. गौरीकुंडच्यान NDRF आनी SDRF बचाव पंगड धाडल्यात.
चारधाम यात्रा हॅलिकॉप्टर सेवेचेर बंदी घातल्या. मुख्यमंत्री पुष्कर सिंह धामी हांणी म्हणलें- हॅली सेवेच्या संचालना खातीर खर एसओपी तयार करतले. हातूंत, उड्डाणा पयलीं हॅलिकॉप्टराची तांत्रीक स्थिती तपासप आनी हवामानाची अचूक म्हायती घेवप बंधनकारक करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
