भांगरभूंय | प्रतिनिधी
खबरां संस्था
नवी दिल्लीः दिल्लीचे मुख्यमंत्री अरविंद केजरीवाल दोन दिसांनी मुख्यमंत्रीपदाचो राजिनामो दितले. अशी घोशणा तांणी आयतारा केल्या. केजरीवाल हांची 13 सप्टेंबराक तिहारांतल्यान सुटका जाले उपरांत आयतारा पयलेच खेपे ते दिल्लीच्या आम आदमी पार्टीच्या कार्यालयांत पावले आनी कार्यकर्तां कडेन उलयले. ह्या वेळार तांचे वांगडा आप फुडारी मनीष सिसोदिया, संजय सिंह आनी आतिशी हाजीर आशिल्ली.
दिल्ली सोरो धोरण घोटाळ्यांत मुख्यमंत्री केजरीवाल हांची जामिनाचेर सुटका जाल्या.
भाजपान आपल्याचेर अप्रामाणीकपणा आनी भ्रश्टाचाराचे आरोप केले. आतां लोकांच्या न्यायालयांत आपल्या प्रामाणीकपणाचो निर्णय जातलो. वेंचणुके मेरेन आपूण मुख्यमंत्र्याच्या कदेलाचेर बसचो ना. तशेंच मनीष सिसोदिया हांचेर लेगीत आपले वरीच आरोप आसात. ते लेगीत कसलेच पद घेवचे ना, अशें केजरीवाल हांणी ह्या वेळार स्पश्ट केलें.
सर्वोच्च न्यायालयान जामीन मंजूर केले उपरांत 177 दिसां उपरांत तिहार बंदखणींतल्यान मुख्यमंत्री केजरीवाल भायर आयले. ते बंदखणींत आसतना तांणी राजिनामो दिवचो अशी मागणी भाजपा फुडाऱ्यांनी केल्ली. ताका लागून केजरीवाल नेमकी कसली भुमिका घेतले, हाचेर सगळ्यांची नदर आशिल्ली. आयतारा दिल्लींत सभेंत तांणी राजिनामो दिवपाची घोशणा केली.
आपूण प्रामाणीक आसा, अशें तुमकांय दिसता जाल्यार आम आदमी पक्षाक घसघशीत मतदान करात. दिल्लीची वेंचणूक फेब्रुवारींत जातली. महाराष्ट्राची वेंचणूक नोव्हेंबरांत जातली. दिल्लीचीय वेंचणूक महाराष्ट्रा वांगडाच घेवची, अशी आपली मागणी आसा, अशें केजरीवाल हांणी सांगलें.जे मेरेन वेंचणूक जायना ते मेरेन पक्षांतलोच कोण तरी मुख्यमंत्री पद सांबाळटलो. फुडल्या दोन दिसांनी आमदारांचे बसकेंत फुडलो मुख्यमंत्री कोण तो थारतलो, अशेंय केजरीवाल हांणी सांगलें.
सत्तेंत आसून हातांत सत्ता ना!
अरविंद केजरीवाल दिल्ली सोरो धोरण प्रकरणांत 177 दिसांनी जामिनाचेर भायर आयल्यात. ते मुख्यमंत्री कार्यालयांत वच्चे नात आनी खंयचेच फायलीचेर सय करचे नात, अशी अट सर्वोच्च न्यायालयान दवरल्या. म्हणल्यार बंदखणींतल्यान भायर येवन मुख्यमंत्री आसून लेगीत तांचे कडेन सत्ता उरूंक ना. मजगतीं, दिल्ली विधानसभेचो कार्यकाळ फेब्रुवारी 2025 त सोंपता. म्हणल्यार सरकारा कडेन वेंचणुके खातीर फक्त 5 म्हयने उरल्यात. केजरीवाल न्यायालयाच्यो अटी पाळपाक बांदील आसात. मात बंदखणींतल्यान सुटले उपरांत लोकां मदीं सहानुभुती आसा. कांय राजकी तज्ञांच्या म्हणण्या प्रमाण केजरीवार 2- 3 म्हयने आदींच वेंचणूक घेवपाची मागणी करपाक शकतात. तशें केलें जाल्यार लोकांचे सहानुभुतीचेर ते ही वेंचणूक जिखपाक शकतात, अशेंय कांय जाणकारांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
