भांगरभूंय | प्रतिनिधी
राजीनामो दिल्ल्या आपच्या कार्यकर्त्यांचो दावो
मडगांव : केळशीचे आदले उपसरंपच रिंकू लोबो, तांचो घोव पॉल लोबो, समर्थक सॅटर्निनो रॉड्रिग्ज आनी हेरांनी आम आदमी पक्षाक सोडचिठ्ठी दिली. गोंय राखपाक विरोधकांच्या एकवटाची गरज आसा. केजरीवाल आनी आम आदमी पक्षाचो राजकीय अजेंडा हो भाजपाक सहकार्य करपाचो आसा, अशी टिका आपच्या कार्यकर्त्यांनी केली.
बाणावले मतदारसंघांतल्या आम आदमी पक्षाच्या कार्यकर्त्यांक राजीनामे दिले. ह्या वेळार केळशीच्या पॉल लोबो हांणी सांगलें, आपूण केळशीच्या आम आदमी पक्षाचो संयोजक आनी आदलो प्रवक्तो. आपली बायल रिंकू लोबो ही केळशीची पंच, तशेंच आदली उपसरपंच. आपल्या वांगडा आपली बायल आनी समर्थकां सयत आम आदमी पक्षाचो राजीनामा दिला. समर्थकां सायत आपणें सात ते आठ वर्सां आम आदमी पक्षा खातीर काम केलां. दोन फावटीं जिल्लो पंचायत वांगडी आनी एकदां विधानसभा वेंचणुके खातीर काम करीत बाणावले आमदारूय आपाचो वेंचून हाडलो. मात जसो वेळ वता, आपाचो राजकी हेतू चुकीचो आशिल्ल्याचें समजलां. बाणावले मतदारसंघांत आम आदमी पक्षाक नांव मेळोवन दिलें.
राज्यांतलें डबल इंजिन सरकार गोंयां खातीर घातकी. गोंयकारांची घुसमट जाता. सत मुखार येवपाक दिनात. अशें आसतनाय आदले मुख्यमंत्री केजरीवाल गोंयांत येवन आपल्याक जाय तशें वागतात. सत्ताधार्यांचेर टिका करपाचे सुवातेर विरोधी पक्ष कॉंग्रेसीचेर टिका करतात. हिंमत आसल्यार तांणी सत्ताधारींक प्रस्न करचो. 40 सुवातो लढपाची हिंमत खंयच्याच पक्षांत नासता ते सगल्यो सुवातो लढटले अशें सांगतात. राज्यांत आपा सयत कॉंग्रेस, आरजीपी आनी गोवा फॉरवर्ड हे विरोधी पक्ष म्हणून आसतना विरोधी पक्षांचेर टिका करप, हातुंतल्यान केजरीवाल हांची भाजपाक परत सत्तेंत हाडपाची मानसिकताय दिसून येता.
केजरीवाल हांणी गोंयकारांक भुलोवचें न्हय. गोंय राखून दवरप होच मुद्दो सध्या आसा. गोंय राखपा खातीर सगल्यांचो एकवट गरजेचो. परत मतांची विभागणी करुन गोंयकार भाजपाच्या हातांत सत्ता देवपाक इत्सूक नात. ह्यान पयलीं आपा खातीर काम केलें आनी हातुंतल्यान मतविभागणी जाली. ह्यान फुडें अशें जावचें ना. आमदार व्हेंझी हांणी गोंयां खातीर सगल्या पक्षांनी एकठांय येवपाची गरज आसा, हें आमच्या पक्षश्रेष्ठींक सांगपाची गरज आशिल्ली. मात तशें जायनाशिल्ल्यान ते गोंयां खातीर काम करिनात हें दिसता, अशेंय तांणी सांगलें.
आपणें खंयच्याच पक्षांत प्रवेश करूंक नाशिल्लो. मात लोकांचीं उदरगतीचीं कामां जावचीं हे खातर सहकार्य करतालों. मात आतां लोकां खातीर तांचे कडेन वेळ नाशिल्ल्यान तांकां सहकार्य करचें न्हय असो निर्णय घेतलो. केजरीवाल हे गोंयकारां खातीर न्हय, जाल्यार भाजपाक सहकार्य करपाक गोंयांत आयल्यात. गोंयांक सोंपोवपाचो तांचो अजेंडा आसा, अशें मत सॅटर्निनो रॉड्रिग्ज हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
