केजरीवालाचो राजिनामो दिल्लींत पक्षाक फायदेशीर?

भांगरभूंय | प्रतिनिधी

बंदखणींतल्यान भायर आयले उपरांत मुख्यमंत्री आसून लेगीत आपणा कडेन सत्ता उरिल्ली ना, आनी मंत्रीमंडळाच्या भरवंश्यार सरकार चलोवचें पडटलें. हाका लागून अरविंद केजरीवाल हांणी राजिनामो दिवपाची घोशणा केली.

दिल्लीचे मुख्यमंत्री अरविंद केजरीवाल फाटले सुमार 177 दीस सोरो घोटाळो प्रकरणांत बंदखणींत आशिल्ले. मदेकांत लोकसभा वेंचणुके वेळार तांकां कांय काळ जामीन मेळिल्लो. आतां जामीन कांय अटींचेर मंजूर जाला. तातूंत मुख्यमंत्री कचेरेंत वचप ना. खंयच्याय फायलींचेर सयो करपाच्यो नात अश्यो कांय अटी सर्वोच्च न्यायालयान जारी केल्यात. वास्तवीक अश्यो अटी आसतना तांणी मुख्यमंत्रीपदाचो कार्यभार कसो सांबाळ्ळो हाचेंच अजाप दिसता. खंयच्याय एखाद्या मंत्र्याक वा मुख्यमंत्र्याक कांय कारणांक लागून अटक जाल्ली आसत जाल्यार तांचो राजिनामो जाय आसता. पूण अशी तरतूद खंयच ना ताचो फायदो खूबश्या जाणांक जाता. बंदखणींतल्यान भायर येतकच केजरीवाल हांणी दोन दिसां भितर राजिनामो दिवपाची घोशणा केली आनी एकूच खवदळ पडलो. दोन दिसा उपरांत तांणी आपलो मुख्यमंत्रीपदाचो राजिनामो दिवन नवो मुख्यमंत्री म्हूण आतिशी मार्लेना हांचें नांव आपाच्या कार्यकारिणींत जाहीर जालें.
आतिशी मार्लेना ह्यो राजकारणांत नव्यो आसात. पयलेच फावटी आमदार जावन तांकां मुख्यमंत्रीपदाचो भोवमान मेळ्ळो. केजरीवाल हांची घरकान्न सुनीता केजरीवाल हांचें नांव पयलीं मुख्यमंत्र्याचे सर्तींत आघाडीचेर आशिल्लें. तशेंच ज्येश्ठ मंत्री गोपाळ राय, सखी बिर्ला हांचींय नांवां चर्चेंत आशिल्लीं. निमाणें आतिशी हांच्या नांवाचेर म्होर मारली. दिल्लीची वेंचणूक महाराष्ट्रा बरोबर नोव्हेंबरांत जावची असो तांचो यत्न आसा. बंदखणींतल्यान भायर आयले उपरांत मुख्यमंत्री आसून लेगीत आपणाक सत्ता उरिल्ली ना आनी मंत्रीमंडळाच्या भरवंश्यार सरकार चलोवचें पडटलें, हाका लागून केजरीवालान राजिनामो दिवपाची घोशणा केली. भाजपान केजरीवालाचेर टिका केली. काँग्रेस पक्षान लेगीत हे टिकेंत भर घाली. केजरीवालाच्या राजिनाम्यान दोन गजालींची शक्यताय आसा. एक म्हणल्यार राजिनाम्याक लागून केजरीवालाक सहानुभुतीची अपेक्षा आसा. ताचो फायदो केजरीवालाक जावंक शकता. दुसरी गजाल म्हणल्यार तांचेर न्यायालयांत वेगळेवगळे खटले चालू आसात. ताका लागून कांय लोकांचीं मतां विरोधी भाजपा वा काँग्रेसीक मेळूंक शकतात.
फाटले विधानसभा वेंचणुकेंत आपाक घसघशीत येस मेळिल्लें. ती परिस्थिती आयज उरिल्ली ना. सध्या काँग्रेस आनी आप हांची युती ना. ताचें लुकसाण आपाक जावंक शकता. तशेंच भाजपा लेगीत सत्ता स्वता कडेन कशी उरतली हाचो यत्न करतली. विधानसभेची मुजत फेब्रुवारी मेरेन आसा. म्हणल्यार वेंचणूक फेब्रुवारी मेरेन जातली काय नोव्हेंबरांत जातली हें अजून निश्‍चीत जाल्लें ना. एकूणच ह्या वेळार केजरीवालाक ही वेंचणूक जड वतली.
77 हजार कोटी वाहनां पडून
सध्या डिलर्सां कडेन सुमार 77 हजार कोटींची वाहनां पडून आसात. हे खातीर फेडरेशन ऑफ ऑटोमोबायल डिलर्स हे संस्थेन हुस्को उक्तायला. ही खबर हालींच वाचली. एके बातमे प्रमाण ऑगस्ट म्हयन्यांत विकूंक नाशिल्ल्या वाहनांचो सांठो 70 दिसा परस चड जाला. विशेश म्हणल्यार ह्या पडून आशिल्ल्या वाहनांची संख्या सुमार 77,800 कोटी रुपयांची आसा. अशीच परिस्थिती कायम उरली जाल्यार फुडारांत डिलर्सांक खूबश्या संकश्टांक तोंड दिवचें पडटलें.
गिरायकां कडल्यान मागणी उणी आसा. तशेंच सैमान लेगीत खूबश्यो अडचणी निर्माण केल्यात. सेगीत पडपी पावस हें एक कारण आसा. फक्त एका म्हयन्यांत विक्रेतलो उणाव 3.46 टक्के आसा. ऑगस्ट 23 वर्सा वट्ट 3,23,720 इतल्या वाहनांची विक्री जाल्ली. ही संख्या ऑगस्ट 24 मेरेन 3,09,053 इतली जाली. वाहनां पडून उरिल्ल्यान डिलर्सांक लुकसाण जावपाची शक्यताय आसा. वाहनांचो सांठो 10 दिसा परस चड दीस पडून उरत जाल्यार डिलर्सांचो फायदो दोन टक्क्यांनी उणो जाता. एकूणच हें संकश्ट बेगीन पयस जावचें अशी अपेक्षा करुया. आतांच वाहन धंद्याक बरे दीस आयल्यात, आनी तातूंतच ही अडचण निर्माण जाल्या.
देशांत जीएसटींतल्यान व्हड चोरी
देशांत वस्तू आनी सेवा कर प्रणाली 2017 सावन चालू केली. एक सुटसुटीत कर प्रणाली म्हणून हाचें म्हत्व आसा. मजगतीं ह्या जीएसटींतल्यान कर चोरप्यांचें प्रमाण लेगीत व्हड आसा. जीएसटी इंटेलिजेंट म्हासंचालकांनी जीएसटी चोरये विशीं आंकडेवारी जाहीर केली. ते प्रमाण 2023-24 ह्या अर्थीक वर्सांत सुमार 2.01 लाख कोटी रुपयांची चोरी जाल्ल्याचें सांगलें. चोरयेचीं एकूण 6084 प्रकरणां उक्तडार आयलीं. विशेश म्हणल्यार ही चोरी करप्यां मदीं ऑनलायन गेमींग कंपनीं, बँकींग संस्था आनी इन्श्युरन्स फर्म हांचो आस्पाव आसा.
खूबशीं प्रकरणां बँकींग वित्तीय संस्था आनी विमो संस्था हांची आसात. तांची संख्या सुमार 171 इतली आसा. अशीं खूबशीं प्रकरणां आसात की जातूंत टॅक्स भरलो ना. एकूणच जीएसटी चोरी हें गंभीर प्रकरण आसा. सरकारान हातूंतल्यो त्रुटी सोदून काडून ताचेर उपाय येवजण करूंक जाय. दोन लाख कोटी ही रक्कम व्हड आसा. सर्वसामान्य लोकांच्या बोल्सांतल्यान हे पयशे वस्तू वा सेवा करांच्या माध्यमांतल्यान वतात. हाचेर अर्थ खात्यान उपाय येवजण करूंक जाय हीच अपेक्षा.

शांताराम वाघ
9623452553