केएलई विद्यापिठाचो आयज पदवीदान सुवाळो

भांगरभूंय | प्रतिनिधी

बेळगांव ः केएलई उच्च शिक्षण आनी संशोधन अकादेमी (केएलई अभिमत विद्यापीठ), बेळगांवाच्या वतीन मंगळारा केएलईएस कन्वेन्शन सेंटरांत पदवीदान सुवाळो घडोवन हाडटले. ह्या सुवाळ्यांत वट्ट 1,844 पदव्यो दितले. संस्थेचे आदले विद्यार्थी सर्जन डॉ. श्रीखंडे हांकां डॉक्टर ऑफ सायन्स (D.Sc.) (Honoris Causa) ही पदवी दितले.
अंदूंच्या पदवीदान सुवाळ्यांत 40 पीएच.डी., 29 पदव्युत्तर डॉक्टरेट (DM/M.Ch.), 660 पदव्युत्तर, 1,080 पदवी, 9 पदव्युत्तर डिप्लोमा, 11 डिप्लोमा, 4 फेलोशिप आनी 11 प्रमाणपत्र अभ्यासक्रम आसपावीत आसात. विद्यार्थ्यांच्या शिक्षणीक उत्कृश्टतायेची दखल घेवन 35 गुणवंत विद्यार्थ्यांक 46 भांगरा पदकां दितले. हातूंत 28 चलयो आनी 7 चले आसात. अंदूं गुणवंत विद्यार्थ्यां मदीं केएलईचे बी. एम. कंकणवाडी आयुर्वेद महाविद्यालयाची डॉ. श्वेता राजशेखर गोरे हिका बीएएमएस शाखेंत चार भांगरां पदकां मेळ्ळ्यात, जी युजी पांवड्यार सगळ्यांत चड पदकां आसा. जवाहरलाल नेहरू वैजकी महाविद्यालयाची डॉ. करुमुडी प्रत्युषा हिका जनरल मेडिसिनांत पीजी पांवड्यार तीन भांगरा पदकां मेळ्ळ्यांत.
ह्या वेळार उलयतना डॉ. कोरे हांणी सांगलें, विद्यापीठ दर्जेदार शिक्षण, प्रात्यक्षिक प्रशिक्षण आनी तंत्रज्ञानाचेर आदारीत अध्यापनाचेर भर दिता जाका लागून विद्यार्थ्यांक भलायकी मळार सदांच बदलपी गरजे खातीर सक्षम करपाक मेळटले. सर्जिकल ऑन्कोलॉजी मळार संवसारीक नामनेचे तज्ञ आनी टाटा मेमोरियल हॉस्पिटलाचे उपसंचालक आनी कॅन्सर सर्जरी विभागाचे मुखेली डॉ. श्रीखंडे हांकां अंदुंची डॉक्टरेट पदवी भेटयतले. जीआय आनी एचपीबी (गॅस्ट्रोइंटेस्टाइनल आनी यकृत-मार्गा कडेन संबंदीत) कॅन्सराचेर केल्ल्या खाशेल्या वावराक लागून तांची नामना आसा. आंतरराष्ट्रीय पांवड्यार तांणी 600 परस चड व्याख्यानां आनी भाशणां दिल्यांत अशी म्हायती विद्यापिठाचे कुलसचिव प्रा. डॉ. एम. एस. गणाचारी हांणी दिली.

केंद्रीय मंत्री नड्डा आसतले हाजीर
ह्या सुवाळ्याचे मुखेल सोयरे म्हूण केंद्रीय भलायकी आनी कुटुंब कल्याण मंत्री आनी रसायनां आनी सारें मंत्री जगतप्रकाश नड्डा हाजीर आसतले. केंद्रीय मंत्री प्रल्हाद जोशी मुखेल सोयरे म्हूण हाजीर आसतले. केएलई संस्था आनी विद्यापिठाचे कुलगुरू डॉ. प्रभाकर कोरे हे कार्यावळीचे अध्यक्षपद सांबाळटले.