केएलईच्या कॅन्सर हाॅस्पिटलाचें राष्ट्रपती मुर्मू हांचे हस्तुकीं उक्तावण

भांगरभूंय | प्रतिनिधी

भांगरभूंय । प्रतिनिधी
बेळगांव : भारतूच न्हय, तर पुराय संवसारांत कॅन्सर हें मरणाचें एक मुखेल कारण जायत चल्लां, हाचे आड लोकांनी एकठांय येवपाची गरज आसा. कॅन्सरा विशीं, तो जावपा फाटल्या कारणां विशीं जागृताय जावप गरजेचें आसा, अशें राष्ट्रपती डाॅ. द्रौपदी मुर्मू हांणी सांगलें. बेळगांवच्या केएलई डाॅ. संपतकुमार शिवनागी कॅन्सर हाॅस्पिटलाच्या उक्तावण सुवाळ्यांत ती उलयताली. 300 खाटांच्या ह्या हाॅस्पिटलाचें तांचे हस्तुकीं उक्तावण जालें.
कॅन्सरा आड लढो हो एकवटान करपाचो यत्न. कॅन्सर जावपाचें प्रमाण दिसान दीस वाडत आसा, ताचे शारिरीक आनी मानसीक परिणाम कितें जातात तें सांगपाची गरज ना. पयलींच ताचें निदान जावप आनी रोखडेच उपचार सुरू जावप गरजेचें. तशें जाल्यार कॅन्सर रोगाचें प्रमाण उणें जातलें, अशें तांणी सांगलें. गांवगिऱ्या लोकांक फायदो जातलो, अशें अत्याधुनिक कॅन्सर हाॅस्पिटल बेळगांवां उबारिल्ले खातीर तांणी डाॅ. प्रभाकर कोरे आनी तांच्या पंगडाची तुस्त केली. कॅन्सराचें निदान आनी उपचार हांचे मदलो वेळ उणो करपाक आयुषमान भारत येवजणेचो खूब सकारात्मक फायदो जाला, अशेंय तांणी सांगलें.
केएलई सोसायटीचे चॅरमन डाॅ. प्रभाकर कोरे हांणी येवार दिलो. आमी सपन साकार केलां. ह्या हाॅस्पिटलाक लागून कर्नाटक, महाराष्ट्र, गोंय आनी तेलंगणाच्या लोकांक कॅन्सराचेर उपचार घेवपाक मेळटले. उपरांत घेवपाचे जतनायेची म्हायती, ते विशींची सुविधाय मेळटली. हें हाॅस्पिटल उबारपाक 300 कोटींचो खर्च आयला, अशे तांणी सांगलें.
केएलईन संवसारीक मळा वयली संस्था जाल्या. आपल्या 310 संस्थां वरवीं ती 1, 45,000 विद्यार्थ्यांक मुळावी यत्ता ते पदव्युत्तर वैजकी अभ्यासक्रमा मेरेनचें शिक्षण दिता. भलायकेच्या मळाचेर वट्ट 4500 खाटांचीं हाॅस्पिटलां आसात. पयलीं कॅन्सराच्या उपचारा खातीर थारावीक म्हानगरांनी वच्चें पडटालें, आतां परवडपी दरांत हाचेर उपचार करप शक्य जातलें, अशेंय तांणी सांगलें.
केंद्रीय मंत्री प्रल्हाद जोशी हांणी हाॅस्पिटल उबारले खातीर डाॅ. कोरे आनी केएलई सोसायटीची तुस्त केली. कर्नाटकाचे वैजकी शिक्षण मंत्री डाॅ. शरण प्रकाश पाटील, बांदकाम मंत्री सतिश जरकीहोळी, खासदार जगदीश शेट्टर, आमदार असिफ सैत, अभय पाटील, केएलई सोसायटीचे अध्यक्ष महंतेश कौजळगी ह्या वेळार हाजीर आशिल्ले.