भांगरभूंय | प्रतिनिधी
एल्टन डिकॉस्टाः सुबदळे रस्त्याचें डांबरीकरण
भांगरभूंय । प्रतिनिधी
केपें: केपेंची उदरगत हेंच आपलें ध्येय. आपल्या मतदारसंघाची सर्वांगी उदरगत जावची हे खातीर आपूण पूर्णवेळ दिला. ह्या मतदारसंघांतलीं खूबशीं प्रलंबीत कामां मुख्यमंत्री डॉ. प्रमोद सावंत हांच्या आदारान आपूण पुराय करता. सरकाराचो आपल्याक पुराय तेंको मेळटा, हे खातीर आपूण सरकाराचें उपकार मानतां. हे मुखार केपें मतदारसंघाची परिस्थिती बदलतली. तरणाट्यांक नोकऱ्यो, मुळाव्यो सुविधा मेळोवन दिवपाक प्राधान्य दितलों, अशें केपेंचे आमदार एल्टन डिकॉस्टा हांणी सांगलें. सुबदळे वाठारांत रस्त्याचें हॉटमिक्स डांबरीकरण कामाक सुरवात करून दिले उपरांत डिकॉस्टा उलयताले.
ह्या वेळार आदले उपमुख्यमंत्री चंद्रकांत कवळेंकार, दक्षीण गोंय जिल्हो पंचायतीचे उपाध्यक्ष खुशाली वेळीप, बार्सेचे सरपंच अर्जून वेळीप, बाळ्ळीचे सरपंच गोविंद देसाय, बार्सेचे पंच विटे गांवकार, सर्वानंद वेळीप, दत्ता वेळीप आनी हेर मानेस्त हाजीर आशिल्ले.
बाळ्ळी पंचायतींतल्या खड्डे, बेंदुर्डे आनी बासरय ह्या वाठारांतल्या रस्त्यांचेंय डांबरीकरण करतले. आपल्या मतदारसंघांतल्या लोकांक अजून मेरेन उदका खातीर खूब त्रास सोंसचे पडटात, हाची आपल्याक जाणीव आसा. ही समस्या सोडोवचे खातीर गांवांतल्या लोकांक तशेंच सरकारी अधिकाऱ्यांक घेवन ती समस्या सोडोवपाचो आपूण यत्न करतलों. पावसाळ्यांत खंडीत वीज पुरवणेक लागून लोकांक खूब त्रास जातात. हाचेर उपाय काडचे खातीर रोखडीच वीज अभियंते आनी पंचां वांगडा बसका घेतलो, अशें आमदार डिकॉस्टा हांणी सांगलें.
खुशाली वेळीप हांणी सांगलें, आमदार डिकॉस्टा हांणी गांवची जाता तितली उदरगत करून घेवची. गांवचे उदरगती कडेन राजकारण करप आपल्याक योग्य दिसना. ताका लागून गांवचे उदरगती खातीर तांकां आमचो सदांच तेंको आसतलो. सुबदळेची थळावी पंच विटे गांवकार हांणी सांगलें, आमदार डिकॉस्टा सदांच लोकांच्या हिता खातीर वावुरतात. आमचो तांकां सदांच तेंको आसतलो. तांच्या मार्गदर्शना खाला आमी खूबशीं कामां हातांत घेतल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
