भांगरभूंय | प्रतिनिधी
गोंयांत ह्याच दर्जाचें लोहखनीज : शुल्क घेवचें न्हय, जीसीसीआयची मागणी
पणजी : केंद्र सरकार गौण लोहखनिजाचेर निर्यात शुल्क आकारपाचो विचार करतात. गोंयच्या चडश्या खणींनी ह्याच दर्जाचें लोहखनीज सांपडटा. निर्यात शुल्क लागू केल्यार हाचो वायट परिणाम गोंयच्या खण आनी ताचे कडेन संबंदीत वेवसायांचेर जावपाक शकता. हाका लागून गौण लोहखनिजाचेर निर्यात शुल्क घेवचें न्हय अशी मागणी गोवा चेंबर ऑफ कॉमर्स अँड इंडस्ट्रीजान (जीसीसीआय) केल्या.
हे विशीं संस्थेन केंद्रीय अर्थ सचिव अजय सेठ हांकां बरयिल्ल्या पत्रां म्हणलां, जीसीसीआय गोंयच्या विवीध उद्देग मळावेलें प्रतिनिधित्व करता. हातूंत खाणकाम आनी धातू उद्देगांचो आसपाव आसा. भारत सरकारान खनीज संसाधनांच्या वाटपा खातीर सामकें येसस्वी आनी पारदर्शक पावणी प्रक्रिया राबयल्या. गोंयच्या खण कंपन्यांनी हे पावणे मजगतीं सध्याचे नेम, कर आनी शुल्क रचणूच लक्षांत घेवन अर्थीक वचनबद्धताय केल्या.
पावणे उपरांतचें धोरणात्मक वातावरण स्थिर रावचे खातीरूच वचनबद्धता केल्यात. गोंयचें लोहखनिज मुखेलपणान गौण दर्जाचें. हाचेर कसलेंच निर्यात शुल्क लादिल्ल्यान गोंयचे बोलीचो आधारच बदलतलो. हाचो गुंतवणूकदारांच्या विश्वासाचेर परिणाम जातलो. तशेंच खाण मळार दीर्घकाळ गुंतवणुकी खातीर गरजेचें आशिल्ल्या धोरणात्मक निश्चितते विशीं चिंता निर्माण जातली.
अर्थीक वर्स २०२४-२५त, स्टील उद्देगा कडल्यान लोहखनिजाचो देशा खाला वापर २५१ मेट्रिक टन आशिल्लो. जाल्यार देशांत २९१ मेट्रिक टन इतकें लोहखनिज उत्पादन जालें. हाका लागून देशांत लोहखनिजाचो उणाव ना. देशां खाला मागणी पुराय केले उपरांतूच फकत अतिरिक्त धातू निर्यात करता. देशां खाला स्टील उद्येगान गौण दर्जाच्या धातूचो वापर करूंक नाशिल्ल्यान लोहखनिजाचो सांठो आनीक वाडटा. उच्च दर्जाच्या लोहखनिजाचेर पयलींच ३० टक्के निर्यात शुल्क घेतात. हाका लागून भारतीय उत्पादनांची सर्त उणी जायत चल्ल्या.
गौण दर्जाचे लोहखनिजाच्या उरिल्ल्या शुल्का वरवीं निर्यात मर्यादीत केल्ल्यान देशां खाला अर्थपूर्ण वाड जावची ना. हाचे बदला ते विक्री जाय नाशिल्ले उरिल्ले सांठे जातले. हाका लागून सांठो आनी संसाधनांचो अपव्यय जातलो. हाचो वेपार संतुलनाचेरूय वायट परिणाम जातलो. अर्थीक स्थिरताये खातीर परकीय जोड वाडोवप सामकें गरजेचें. हाचे खातीर खण मळा खातीर सध्याचे नेम, कर आनी शुल्क रचणूक कायम दवरप गरजेचें आशिल्ल्याचें पत्रांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
