भांगरभूंय | प्रतिनिधी
नवी दिल्ली ,खबरां संस्था: केंद्र सरकारान देशभरांत विज्ञानीक चाचणी आनी मंजुरे बगर उत्पादन करपी आनी विकपी फिक्स्ड कॉम्बिनेशन डोस वखदांचेर व्हड कारवाय केल्या. केंद्रीय वखदां मानक नियंत्रण संघटणेन सगलीं राज्यां आनी केंद्रशासीत प्रदेशांच्या वखद नियंत्रकांक ३५अमान्य एफसीडी वखदांचें उत्पादन आनी विपणन थारावपाचे खर निर्देश दिल्यात. ह्या एफसीडी वखदांनी आंगाची दुख पयस करपी, गोडेंमुताचीं वखदां, हाय ब्लड प्रेशराचीं वखदां, प्रजनन वखदां आनी पुश्टीक पुरक आहाराचो आसपाव आसा.
मेळिल्ले म्हायती प्रमाण, ड्रग कंट्रोलर जनरल ऑफ इंडिया डॉ. राजीव सिंह रघुवंशी हांणी जारी निर्देशांत अशें म्हणलां, कांय एफडीसी वखदांक तांची सुरक्षितताय आनी परिणामाचें विज्ञानीक मुल्ल्यांकन करिनासतना राज्य पांवड्यार परवाने दिल्यात, जे भलायकेचे नदरेन धोको निर्माण करता. अशे अनियमिततायेक लागून दुयेतींची जीण धोक्यांत येवपाक शकता, अशी शिटकावणी ड्रग कंट्रोलर जनरलान दिल्या. हीं वखदां, वखदांच्यो प्रक्रिया, वखदांचो परस्पर संवाद आनी खर भलायकी धोके निर्माण करपाक शकतात. कारण तीं विज्ञानीक नदरेन सिद्ध जावंक नात. सीडीएससीओन राज्यांक स्पश्ट सुचवण्यो दिल्यात, नोंदणी केल्ल्या ३५ एफडीसी वखदां सयत हेर सगळें अमान्य एफडीसी वखदांचें उत्पादन, वांटप आनी विक्री तेन्नाच थारावची. तशेंच ह्या वखदां आड चवकशी करून गरजेची कायदेशीर कारवाय करची.
नेम पाळात
ड्रग कंट्रोलर जनरल ऑफ इंडियान राज्यां आनी केंद्रशासीत प्रदेशांच्या वखद नियंत्रकांक तांच्या एफडीसी मंजुरी प्रक्रियेचो परत विचार करपाचे कायदे आनी नेम खरपणान पाळप हें सुनिश्चीत करपाचे निर्देश दिल्यात. वखद नियामक सर्वोच्च संस्थेन ३५ फिक्स्ड डोस कॉम्बिनेशन म्हळ्यार एफडीसी वखदांचें उत्पादन, विक्री आनी वाटपाचेर बंदी घातल्या. दुखीच्यो, पुश्टीक आहारा संबंदी आनी गोडेंमुताच्या वखदांचो हातूंत आसपाव आसा. वखदांचो हातूंत आसपाव आसा, हाच्या बंदी विशीं सगलीं राज्यां आनी केंद्रशासीत प्रदेशांच्या वखद नियंत्रकांक निर्देश दिले. एफडीसीय अशीं वखदां आसा, जातूंत एका निश्चीत प्रमाणांत दोन वा ताचे परस चड फार्मास्युटिकल घटकांचो वापर करतात. कांय एफडीसी वखदांक सुरक्षा आनी परिणामांच्या पयलींच्या मुल्यांकना बगर उत्पादन, विक्री आनी वाटपाचे परवाने दिल्ले. हाका लागून लोकांची भलायकी आनी सुरक्षीतताये खातीर गंभीर धोको निर्माण जाल्लो. असल्या वखदांचेर ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
