भांगरभूंय | प्रतिनिधी
नवी दिल्ली, खबरां संस्था: केंद्र सरकाराच्या मत्स्यवेवसाय, पशुसंवर्धन आनी दूद वेवसाय मंत्रालयान बर्ड फ्लू (H5N1) विशीं पंजाब सयत ९ राज्यां खातीर अलर्ट जारी केला. एव्हियन इन्फ्लूएंझा (H5N1) विशाणून भारतांत प्रवेश केला. जे लोक संक्रमीत चिकन खातात तांकां विषाणूची लागण जावपाक शकता, अशें मंत्रालयाची सचीव अलका उपाध्याय हांणी जारी केल्ल्या पत्रांत नमूद केलां.
‘जानेवारी २०२५ सावन, सरकारी पोल्ट्री फार्म सयत ९ राज्यांनी एव्हियन इन्फ्लूएंझा विशाणुची प्रकरणां नोंद केल्यांत. ह्या विषाणूचो संसर्ग आडावपा खातीर बेगोबेग लक्ष दिवपाची गरज आसा. सगले सरकारी, वेवसायीक आनी घरा फाटल्यान पोल्ट्री फार्मांक जैवसुरक्षा उपाय घटमूट करचे पडटले.’ अशें मंत्रालयान जारी केल्ल्या पत्रांत म्हणलां.
सगल्यो शासकीय पोल्ट्री फार्मचें जैवसुरक्षा लेखापरीक्षण बेगीनूच करून तातूंतलें उणेंपण बेगोबेग पयस करचें, अशें केंद्र शासना वतीन सांगलें. हाचे भायर जैवसुरक्षा प्रोटोकॉलचे खर पालन सुनिश्चीत करपा खातीर आनी असामान्य मरणा वेळार अहवाल दिवपा खातीर पोल्ट्री फार्म कर्मचार्यांक जागरूकताय कार्यावळ सुरू करची, अशेंय तातूंत नमूद केलां.
राज्यांनी एव्हीयन इन्फ्लूएन्झाक तोंड दिवपा खातीर राष्ट्रीय कृती येवजण पाळची. तशेंच जलद प्रतिसाद पंगड सक्रिय करात आनी पशुवैजकी आनी प्रयोगशाळांचो आंकडो वाडोवपाचे निर्देश दिल्यात. ह्या उपायां कडेन खर लक्ष दिल्यार एव्हीयन फ्लूचो प्रसार आडावपाक मजत जातली अशें केंद्रान म्हणलां.
बर्ड फ्लूचीं लक्षणां
बर्ड फ्लूची लक्षणां विशेश म्हळ्यार H5N1 सारख्या स्ट्रेनाचीं लक्षणां विवीध आसपाक शकतात. मात जायते फावट तीं सामान्य इन्फ्लूएंझा सारकीं आसतात. दोळे तांबडे जावप, जोर, खोंकली मारप, थकप, स्नायू दुखप, गळो दुखप, ओकूंक येवप, बायर जावप, गॅस्ट्रोचो त्रास, नाक बंद जावप, स्वास घेवपाक त्रास अशीं बर्ड फ्लूचीं लक्षणां जाणवपाक शकतात.
बर्ड फ्लू संसर्ग कसो जाता?
बर्ड फ्लू, वा एव्हीयन इन्फ्लूएन्झा, हो व्हायरस मुखेलपणान सवण्यांक प्रभावीत करता. मात विशीश्ट पद्दतीन मनशांकूय ताचो त्रास जाता. संक्रमीत सवणीं वा दुशीत वातावरणाच्या संपर्कांत आयिल्ल्यान हो विशाणू पातळटा. जो मनीस संक्रमीत सवणें पोसतात वा पोल्ट्री फार्मा कडेन लागींच्या संपर्कांत आसतात तांकां एव्हीयन इन्फ्लूएंझा जावपाक शकता. सारकें शिजोवंक नाशिल्लें चिकन खाल्ल्यानूय हो विशाणू संसर्ग मनशा मदीं जावपाक शकता.
बर्ड फ्लू प्रतिबंधात्मक उपाय
सवण्यांक स्पर्श केले उपरांत, विशाणू आशिल्ले सुवातेक भेट दिले उपरांत आपले हात सदांच साबणाच्या उदकान धुवचे. एव्हीयन इन्फ्लूएन्झाच्या संपर्कांत आशिल्ल्या जनावरां कडलो संपर्क मोडचो. बर्ड फ्लूच्या लक्षणांकडेन आडनदर करची न्हय आनी वैजकी मजत घेवची. चिकन आनी तातयां वेवस्थीत शिजोवन खायात. गंभीर दुयेंसाचो धोको उणो करपाक फ्लूची लस घेयात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
