भांगरभूंय | प्रतिनिधी
नवी दिल्ली, खबरां संस्था: केंद्र सरकारान लडाख विशीं व्हड निर्णय घेतला. लडाखांत पांच नव्या जिल्ह्यांची घोशणा केंद्र सरकारान केल्या. केंद्रीय गृहमंत्री अमित शाह हांणी हे विशींची म्हायती ‘एक्स’ (ट्विटर) अकावंटाचेर दिल्या. तशेंच लडाखांत पांच नवे जिल्हे स्थापन करपाचो निर्णय हो विकसीत आनी समृद्ध लडाख करपाचो प्रधानमंत्री नरेंद्र मोदी हांचें सपन पुराय करपा खातीर घेतिल्ल्याचें अमित शाह हांणी म्हणलें.
मजगतीं, लडाखांत आतां जंस्कार, द्रास, शाम, नुब्रा आनी चांगथांग अशे पांच नवे जिल्हे स्थापन करपाची घोशणा गृहमंत्री अमित शाह हांणी केली. उपरांत प्रधानमंत्री नरेंद्र मोदी हांणीय एक्सचेर पोस्ट करीत लडाखच्या लोकांक परबीं भेटयलीं.
लडाखांत पयलीं दोन जिल्हे आशिल्ले
जम्मू-काश्मीर पसून लडाख २०१९ त वेगळें केल्लें. ताका लागून लडाख नवो केंद्रशासीत प्रदेश जाल्लो. तेन्ना केंद्रशासीत प्रदेशांत लेह आनी कारगिल हे दोनूच जिल्हे आशिल्ले. मात, आतां लडाखांत आनीक पांच नव्या जिल्ह्यांची घोशणा केली. आतां लडाखांत ज़ंस्कार, द्रास, शाम, नुब्रा आनी चांगथांग हे नवे जिल्हे आसतले. ताका लागून उदरगत चड नेटान जातली, अशें तांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
