भांगरभूंय | प्रतिनिधी
काँग्रेस, गोवा फॉर्वर्डाचो आरोप
पणजी: केंद्र सरकारान हालींच कर्नाटकांतल्या हॉस्पेट-तीनईघाट ह्या ३१२ किलोमिटर रेल्वे मार्गाच्या दोट्टीकरणाचें काम पुराय जाल्ल्याची घोशणा आयतारा केली. हो प्रकल्प हॉस्पेट वास्को ह्या ३६३ किलोमीटरच्या रेल्वे मार्गाचे दोट्टीकरण येवजणेचो एक भाग आसा. हाचे उपरांत गोंयांत विरोधकांनी सेगीत प्रतिक्रिया उक्तायली. फाटल्या कांय वर्सां सावन ह्या प्रकल्पा आड आंदोलन जातनाय केंद्र सरकारान तांचे कडेन आडनदर करून हो निर्णय घेतलो असो आरोप कॉंग्रेस आनी गोवा फॉरवर्डान केला.
हे विशीं रेल्वे अधिकार्यांनी दिल्ले म्हायती प्रमाण, रेल्वे मार्गाच्या दोट्टीकरणाक लागून कोळसो, लोह आनी स्टील येरादारी वेगान जावपाची आशिल्ल्यान प्रवासी येरादारीय सुदारतली. तशेंच हम्पी आनी गोंयच्या पर्यटनाकूय हाचो फायदो जातलो, असो दावो रेल्वे मंत्रालयान केला. मात ह्या दाव्यांक विरोधकांनी भायर मारल्यात.
मुरगांवचे जनतेक पयलींच कोळसो येरादारीक त्रास सोसचे पडटात. तरी ‘डबल इंजिन’ सरकार बळयां ह्या मार्गाचें दोट्टीकरणाचें काम करतात. निमाणें केंद्रान मान्य केलें, हो प्रकल्प कोळसो येरादारी खातीरूच आसा. गोंय सरकार सदांच म्हणटालें, हो प्रकल्प कोळशा कडेन संबंदीत ना. मात सत उक्तें जालें, अशें विरोधी पक्ष फुडारी युरी आलेमाव हांणी ट्विटराचेर ह्या प्रकरणांत प्रतिक्रिया दितना म्हणलें.
गोंय फॉरवर्डचे फुडारी विजय सरदेसाय हांणीय ट्विटरावेल्यान केंद्र-राज्य सरकाराचेर टिका केली. मुरगांव कोळसो प्रदुशणान पयलींच उध्वस्थ जालां. आतां हें सरकार वेळसाव पसून कुळें गांवूय नश्ट करपाचे तयारेंत आसा. गोंयकारांचो हो व्हड विस्वासघात आशिल्ल्याची टिका तांणी केली.
मजगतीं, पर्यावरण मोगी आनी थळाव्या नागरिकांनी ह्या प्रकल्पाक सुरवातेक सावन विरोध केलो. गोंयच्या संवेदनशील पर्यावरणाचेर आनी भलायकेचेर ह्या दोट्टीकरणाचो गंभीर परिणाम जातलो अशी तांची शिटकावणी आसा. मात केंद्र सरकारान उद्देगा संबंदी फायद्या खातीर लोकांच्या आक्षेपांकडे आडनदर केल्ल्याचो आरोप विरोधकांनी केला.
प्रकल्पाचें काम ८५-९० टक्के पुराय
रेल्वे दोट्टीकरण प्रकल्प ८५-९० टक्के पुराय जालां. गोंय आनी कर्नाटकांतले प्रकल्प भूंय संपादनाक लागून आडकल्यात. ह्या प्रकल्पां खातीर ३,६९२ कोटी खर्च अपेक्षीत आसा. ह्या प्रकल्पाचें काम २६ जुलय २०१२ दिसा सुरू जालें. प्रकल्प पुराय जावपाची आदली तारीख २७ जुलय २०१६ आशिल्ली. भूंय संपादनाक जाल्ल्या कळावाक लागून हे तारखेंत प्रकल्प पुराय जावंक ना. प्रकल्प पुराय करपाची नवी मुजत आतां ३१ डिसेंबर २०२६ आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
