भांगरभूंय | प्रतिनिधी
नवी दिल्ली, खबरां संस्था : फाटल्या कांय दिसां सावन कांद्याचो दर एक सारको वाडतूच आसतना केंद्र सरकारान कांदो निर्यातीस खातीरची किंमत निश्चीत केल्या. वेळार हस्तक्षेप केल्ल्यान कांद्याचो दर देशभरांत ५ ते ९ टक्के उणो जाला.
कांद्याचे किमतींत जावपी वाड पळयल्यार, देशांतल्या बाजारांनी कांदो वाडोवपा खातीर केंद्रान आयज, ३१ डिसेंबर मेरेन कांद्याचे निर्यातीचेर ८०० डॉलर प्रती टन किमान निर्यात किंमत निश्चीत करपाची घोशणा केल्या.
सरकारान उखलिल्ल्या ह्या पावलाचो परिणाम रोखडोच दिसून आयला. महाराष्ट्रा सयत देशांतल्या सगळ्या राज्यांनी कांद्याचो दर ४.५ टक्क्यांनी देंवला. थळाव्या बाजारांतूय कांद्याचे किमतींत बदल जाल्ल्याची नोंद जाल्या.
गिरायक वेव्हार विभागान संकलीत केल्ल्या आंकड्यां प्रमाण सोमारा कांद्याची किंमत ५०.३५ रुपया प्रती किलो आशिल्ली. जाल्यार चडांत चड ८३ रुपया प्रती किलो आनी उण्यात उणी ६० रुपया प्रती किलो किंमत आशिल्ली. केंद्राकडेन पयलींच ५ लाख टन कांदो बफर स्टॉकांत उपलब्ध आसा, अतिरिक्त दोन लाख टन कांदो बफर स्टॉक म्हणून विकती घेवपाची घोशणा केल्या. हवामाना कडेन संबंदीत कारणांक लागून खरीप कांदो रोवपाक उशीर जालो. ताका लागून क्षेत्र उणें जालें आनी पीक उसरां आयलें. खरीप कांद्याची नवी आवक आतां पसून सुरू जावपाक जाय आशिल्ली. पूण तशें जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
