भांगरभूंय | प्रतिनिधी
पणजीः ज़ुआरी पुलाचेर नियोजीत ‘ट्विन टॉवर्स’च्या कामाचें उक्तावण शुक्रारा केंद्रीय रस्तो, येरादारी आनी म्हामार्ग मंत्री नितीन गडकरी हांचे हस्तुकीं जातलें. सुमार 270 कोटी रुपया खर्च करून ज़ुआरी पुलाचेर हे टॉवर्स उबारतले आनी फुडल्या पांच वर्सांत हो प्रकल्प पुराय जावपाची शक्यताय आसा.
पॅरिसांतल्या आयफेल टॉवरांतल्यान प्रेरणा घेवन ह्या प्रकल्पांत हे टॉवर्स उबारतले. हाचे भायर तातूंत
व्ह्यूइंग गॅलरी, कॅफेटेरिया, घोळटे रेस्टॉरंट, आर्ट गॅलरी, पार्किंग हांचोय आस्पाव आसतलो. पर्यटकांक गॅलरींत वचून ज़ुआरी न्हंय आनी वाठाराची सैमीक सोबीतकाय पळोवपाक मेळची म्हणून टॉवर्सांत लिफ्टीची वेवस्था करतले. हे दोनूय टॉवर्स दरेकीं 125 मिटर उंचायेचे आसतले. तातूंत 22.50 बाय 17.80 इतले दोन प्रशस्त माळयो आसतले, अशें टॉवर्सां खातीर कंत्राट घेतिल्ल्या दिलीप बिल्डकॉन कंपनीन सांगलां.
पर्यटकांक आकर्शीत करपा खातीर प्रकल्प
संवसारीक पांवड्यावेलें पर्यटन थळ जाल्ल्या गोंयांत चडांत चड पर्यटकांक आकर्शीत करपाच्या हेतान केंद्र सरकारान ज़ुआरी पुलाचेर ट्वीन टॉवर्स उबारपाचें थारायलां. ह्या टॉवर्सांनी मुळाव्या साधनसुविधां सयत गोंयचे सोबीतकायेक आनीक भर घालतले. प्रकल्पाक लागून जायत्यो रोजगार संदीय मेळटल्यो अशें तशेंच, केंद्रीय मंत्री नितीन गडकरी हांणी ज़ुआरी पुलाच्या उक्तावण सुवाळ्यांत उलयतना स्पश्ट केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
