भांगरभूंय | प्रतिनिधी
पणजी : मंत्रिमंडळांत फेरबदल वा फेररचणूक जावची, अशें म्हाका दिसून उपेग ना. मंत्रिमंडळ फेरबदल हो मुख्यमंत्र्यांचो अधिकार. केंद्रीय नेतृत्वा कडेन चर्चा करून मुख्यमंत्री मंत्रिमंडळ फेररचने विशीं निर्णय घेतले, असे प्रदेश भाजप अध्यक्ष सदानंद शेट तानावडे हांणी स्पश्ट केलें.
प्रदेश अध्यक्ष म्हणून नव्या मुखामळाक संद मेळपाक जाय. सगळ्या स कार्यकर्त्यां मदीं अध्यक्षपदाची जापसालदारी पेलपाची तांक आसा, अशेंय तांणी स्पश्ट केलें.
प्रुडंट चॅनलाक दिल्ल्या हेड ऑन मुलाखतींत प्रदेश भाजप अध्यक्ष तशेंच राज्यसभा खासदार सदानंद शेट तानावडे उलयताले.
मंत्रिमंडळ फेरबदलाची चर्चा सुरू आसा. आमचो पक्ष हो राष्ट्रीय पक्ष. हाका लागून कसलोय म्हतवाचो निर्णय हो केंद्रीय नेतृत्वा कडेन चर्चा करून आनी तांचे मान्यतायेन घेवचो पडटा. मंत्रिमंडळ फेरबदलाचो निर्णयूय मुख्यमंत्री केंद्रीय नेतृत्वा कडेन चर्चा करून घेतले, अशें तांणी म्हणलें. टूलकिट प्रकरणा विशींय मुख्यमंत्र्या कडेन चर्चा केल्या.
२०२० वर्सा हांवें अध्यक्षपद सांबाळ्ळें. म्हज्या अध्यक्षपदाचे कारकिर्दींत जायत्यो वेंचणुको जाल्यो. पक्षान त्यो जिकल्यो. हेर पक्षांतल्या आमदारांनीय पक्षांत प्रवेश केलो. हाका लागून मंत्री, आमदारां कडेन म्हजे भावनीक नातें तयार जालें. ह्या भावनी नात्यांतल्यान हांवेंच अध्यक्षपदार रावचें, अशी मागणी जावपाची शक्यताय आसा. तरी नव्या मुखामळांक संद मेळपाक जाय. कार्यकर्ता म्हणून पक्षाचें काम हांव आनदलेवरींच करतलों. २० जानेवारी मेरेन नव्या अध्यक्षांची निवड जातली, अणें तांणी म्हणलें.
वेंचणुके वेळार बोवाळ नाका म्हणून मगो वांगडा युतीची चर्चा सुरू आसा. ह्या वेळार विधानसभा वेंचणुके उपरांत मगो हो सरकाराचो भाग जालो. युतीची चर्चा सुरू आसतना एखाद्या मतदारसंघाचेर जापसालदार व्यक्तीन दावो करप अयोग्य जावन आसा. प्रियोळ मतदारसंघाचेर दावो केले उपरांत मगोच्या फुडार्यां कडेन चर्चाय जाल्या. जागे वाटपाची चर्चा वेंचणुके वेळार जातली. ताचे पयलीं खंयच्याच मतदारसंघाचेर दावो करूंक नाकात, असो समज मगोक दिला. युतीची चर्चा सुरू असली तरी खंयच्याच मतदारसंघांत पक्षाचें काम करपाक हरकत ना. मडकय मगोचो आमदार जरी आसलो तरी भाजपाचें काम सुरू आसा. हाका लागून मगोकूय खंयच्याय मतदारसंघात काम करपाक हरकत ना.
विधानसभा वेंचणुकेंत पक्षाक बरें येस मेळ्ळें. लोकसभा वेंचणुकेंत मात दक्षिणेंत अपेस सोंसचें पडलें. प्रदेश अध्यक्ष म्हणून हाचो दोश महजेर येता आनी हांव तो स्विकारतां. जैता विशीं आशिल्लो अती विस्वास पक्षाक नडलो. देश पांवड्यारूय ४०० परस चड सुवातो जिखपाचें लक्ष्य आशिल्लें. प्रत्यक्षांत २४० सुवातांचेर जैत मेळ्ळें. दक्षीणेत अपेसा विशीं पक्षाच्या कार्यकर्त्यांनी आत्मचिंतन करपाची गरज आसा.
हेर पक्षांतले आमदार तशेंच कार्यकर्ते पक्षांत आयल्यात. हांतल्या कांय आमदारांनी विचारसरणीचो स्वीकार करून पक्षाच्या कार्यांत भाग घेवपाक सुरवात केल्या. हे प्रक्रीयेंत आदल्या कार्यकर्त्यांचेर अन्याय जावचो ना, हाची जतनाय घेवपाचें आव्हान फुडार्यां मखार आसा, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
