केंद्रीय कामगार कायदे फाटीं घेवचे, आंगणवाडी आनी हेर कर्मचार्यांक सातवो वेतन आयोग लागू करचो
भांगरभूंय | प्रतिनिधी
अखिल भारतीय ट्रेड युनियन कॉंग्रेसीचो मोर्चा: केल्यो विवीध मागण्यो
पणजी : अखिल भारतीय ट्रेड युनियन कॉंग्रेस (आयटक) वतीन आयज बुधवरा आझाद मैदानार व्हड मोर्चा काडलो. ह्या वेळार तांणी चार केंद्रीय कामगार कायदे फाटीं घेवप, आंगणवाडी आनी हेर कर्मचार्यांक सातवो वेतन आयोग लागू करप अश्यो विवीध मागण्यो केल्यो. ह्या वेळार आयटकान केंद्रीय कामगार संघटणांच्या देशव्यापी संपाकूय फाटबळ दिलें.
मोर्चाक ख्रिस्तोफर फोन्सेका, ऍड. सुहास नायक, राजू मंगेशकार, प्रसन्ना उटगी हांचे सयत राज्यभरचे कामगार हाजीर आशिल्ले.
केंद्र सरकारान संमत केल्ले चार कामगार कायदे रद्द करपाक जाय. हे कायदे कामगारांच्या हिताचे न्हय. ते कायदे भांडवलदारांच्या फायद्या खातीर तयार केल्यात. राज्यांत हे कायदे लागू जाल्यार कामगारांचें म्हत्व उणें जातलें. हाका लागून कामगारांक हायर अँड फायर करप सोपें जातलें. ह्या कायद्याक लागून कामगारांक गुलामा प्रमाण वागणूक मेळपाची शक्यताय आसा. हाका लागून सरकारान हे कायदे फाटीं घेवपाक जाय अशी मागणी ख्रिस्तोफर फोन्सेका हांणी केली.
राज्यांत फार्मा कंपनींतले कामगार संपार वच्चे न्हय म्हणून परत परत एम्सा लायलें. हाका लागून कामगारांचे अधिकार उणे जाल्ल्यान हो कायदो रद्द करप गरजेचें. पंचायत, गोवा डेअरी, पुर्व मुळावे मदत करप्यांक पीब्ल्यूडी कामगार पुरवण सोसायटी जायत्या कर्मचार्यांकूय सातवो वेतन आयोग लागू करप गरजेचें. देशभर उण्यांत उणें वेतन २६ हजार रुपया करप, मनरेगांत दर २९० दीस काम आनी दिसाक ६०० रुपया वेतन, शेतकारांक पुराय रीण माफी अशो मागण्यो कायम आसात.
राजू मंगेशकार हांणी सांगलें आमी राज्य सरकारा कडेन कदंब, फेरी मार्गांचें खाजगीकरण करचें न्हय अशी मागणी केल्या. तशेंच निवृत्त सरकारी कर्मचार्यांक मुजतवाड दिवची न्हय, राज्यांतली जमीन रूपांतरण आडावप, रितीं सरकारी पदां रोखडींच भरप अश्यो मागण्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
