भांगरभूंय | प्रतिनिधी
गोंय ल्हान राज्य, राजभास कोंकणीन गोंयांक राज्याचो पावंडो मेळोवन दिलो. तेंच राज्य आयज राश्ट्रीय उत्सव, बसकांचें थळ जाता. त्या बसकांक देस, विदेसांत पावोवपी तंत्रज्ञानय देस पावंड्या वेल्यान राज्यांत आसा. तुयें इलेक्ट्राॅनिक उद्देगीक केंद्र देस, विदेसांतल्या तंत्रज्ञानाची उत्कृश्ठताय गोंयांत हाडटलें. पंचवीस वर्सां आदलें राज्य सरकाराचें सपन नव्या रुपांत चालीक लागिल्लें दिसतलें. केंद्र सरकाराच्या अर्थसंकल्पाचो लाव तुयें इलेक्ट्राॅनिक केंद्रा खातीर घेवचो.
विधानसभा वेंचणुको लागीं येतना केंद्रीय अर्थसंकल्पात गोंय लिपलां तें दिसता. ओरिसा, केरळ, आंध्र प्रदेस, तामीळनाडू, कर्नाटक, गुजरात, अस्तंत बंगाल हीं व्हड राज्यां. तातूंतल्या कांय राज्यांच्यो वेंचणुको अंदू जातल्यो. तांचे खातीर केंद्र सरकाराच्या अर्थसंकल्पांत उदरगतीचो मार्ग दाखोवपी तजवीज आसा. सुपुल्लें गोंय राज्य अर्थसंकल्पांतल्या येवजणींनी लिपलां. गोंयांत परतून आयिल्ले गोंयकार आयएएस अधिकारी त्या येवजण्यांचो लाव राज्याक मेळोवन दिवंक उपेगी.
अर्थमंत्री डाॅ. प्रमोद सावंत वांगडा शंभर थळाव्यांक घेवन केंद्रीय अर्थसंकल्प पळेतात. दोन- तीन वरां एकेच बसकेर बसून केंद्रीय अर्थसंकल्प पळोवप सोंपें नासता. मुख्यमंत्री जेन्ना तें करतात तेन्ना राज्याच्या अदमासपत्रकाचे बांदावळीची मोख आसता. केंद्रीय अर्थसंकल्प गोंयच्या वेंचणूक वर्सांतल्या अदमासपत्रकाची दिका आसा.
विधानसभा वेंचणूक लागीं येता तेन्ना अदमासपत्रकांत टॅक्स नासता, उदरगतींची नवीं पावलां कशीं आसतलीं तें अदमासपत्रक सांगता. नवे पिळगेक उर्बा दिवपी, मार्गदर्शन करपी केंद्रीय अर्थसंकल्प आसा. कांय जाणांक तो चार पावलां फाटीं घालता अशेंय दिसतलें. अर्थसंकल्प समेस्त, समेस्तां भितरल्या दिव्यांगां पासत, व्हड राज्यांतल्या ल्हान मनशाक एकठांय येवपाचो उलो मारपी आसा.
गोंयांक शिक्षण, पर्यटन, भलायकी, वखदां (फार्मास्युटिकल्स), खण उद्येग, रानां, न्हंय येरादारी, इलेक्ट्राॅनिक आनी एआय केंद्र, शेतकाम, साधनसुविधांचे बांदावळीक अर्थसंकल्पांतल्या येवजणींचो लाव मेळूंक शकता. ते खातीर येवजण्यो आसात, केंद्रीय अर्थसंकल्पांतल्यान पयसो मेळोवपा पासत राज्याच्या अर्थसंकल्पांत तजवीज जातली. ल्हान विमानतळ फुडारांत पांच वर्सां भितर दक्षीण गोंयांक मेळटलो, अशी आस्त अंदूचो राज्य अर्थसंकल्प दाखयत व्हय?
गोंय सुपुल्लें राज्य आसलें तरी देसा खातीर एक ल्हान शार. अंदूच्या केंद्रीय अर्थसंकल्पांत देसांतल्या मुखेल शारां पासत (स्मार्ट सिटींत आशिल्ल्या) खासा येवजण आसा. ते येवजणीचो लाव गोंयांक मेळूंक शकता. मडगांव, वास्को, म्हापशें, फोंडें शारां पासत. कोयर वेवस्थापन, नव्या वेवसायांचे बांदावळी पासत येवजण मोलादीक आसा.
– सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
