भांगरभूंय | प्रतिनिधी
खबरां संस्था
हैदराबादः आमचो देश उदक, पिकाळ जमीन, कोळश्या साठो ह्या सारक्या सैमीक साधन संपतीन परिपूर्ण असो आसा. बीआरएस पक्ष केंद्रांत सत्तेर आयल्यान दोन वर्सां भितर देशांतल्या लोकांक 24 वरां वीज पुरवण करपाचें उतर बीआरएसाचे राष्ट्रीय अध्यक्ष आनी तेलंगणाचे मुख्यमंत्री के चंद्रशेखर राव हांणी परत एक फावट दिलां. बीआरएस व्हो फकत राजकी पक्ष न्हय जाल्यार भारत बदलपाचें सपन बाळगुवपी ती एक चळवळ आसा अशें तांणी तेलंगणा राज्य निर्मणेच्या दशकपूर्ती कार्यावळी निमतान हैदराबाद हांका महाष्ट्रांतल्या राजकी फुडाऱ्यां कडेन संवाद सादतना सांगलें.
फाटल्या 77 वर्सा सांवन केंद्रांतल्या सरकारानी जें साध्य करपाक जाय आशिल्लें ताचे कडेन आडनदर करून दिशाहीन पद्दतीन राजकारभार चलयलो असो आरोप करून देशाचे वाडीक आडखळ तयार करतल्यांक कुशीक काडपाचा वावरा खातीर बीआरएसा फाटल्यान रावपाचो उलो तांणी लोकांक मारला. आजे आनी बापायचें नांव घेवंन तशेंच पक्षांच्या संस्थापकांच्या नावान राजकारण करपाचे दीस आतां फाटीं पडल्यात. राजकारण्यांनी आतां नामधारी न्हय जाल्यार कामधारी जावपाक जाय अशें तांणी सांगलें.
महाराष्ट्रा सयत मध्यप्रदेशांतल्यान बीआरएस पक्षांत प्रवेश केल्ल्यांचो आंकडो सध्या वाडत आसा. के चंद्रशेखर राव हाणी चालीक लायिल्लीं बीआरएसाची धोरणा आनी लोक कल्याणकारी कार्यावळींक लागून जेश्ठ राजकी फुडारी, विचारवंत पक्षाकडेन आकर्शीत जावपाक लागल्यात. खासदार बुद्धसेन पटेल हांची मध्यप्रदेश बीआरएसाचे संयोजक म्हणून नियुक्ती केल्या उपरांत थंयचे लोक व्हडा संख्येन पक्षांत येवपाक लागल्यात. फाटल्या आयतारा के चंद्रशेखर राव हाचे हाजेरींत मध्य प्रदेशांतल्या सुमार दोनशें मुखेल राजकी फुडाऱ्यांनी पक्षांत प्रवेश केलो. गुलाबी स्कार्फ घालून चंद्रशेखर राव हांणी तांकां पक्षांत येवकार दिलो. चंदवाडा जिल्हांतले आदले आमदार, जुन्नर देव मतदारसंघातले आदले आमदार रामदास वायके, सर्वजन कल्याण पक्षाचे अध्यक्ष संजय यादव, गोंडवान पक्षाचे अध्यक्ष शोभाराम बलवी, भुवन सिंग कोराम, लक्ष्मण मस्कोले हांचो बीआरएस पक्षांत प्रवेश केल्ल्यां मदीं आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
