भांगरभूंय | प्रतिनिधी
इनाफ इज इनाफ चळवळीचो कॅसिनो आड मोहमेक फाटबळ: परवानाधारकाचें नांव उक्तें करपाची मागणी
पणजी : गोंय जुगार (गेमिंग) कायद्या प्रमाण परवाना हस्तांतरीत करपाक मनाय आशिल्ल्यान अपवादात्मक स्थितींत खर अटी आनी निर्बंध घालून एका मनशाच्या नांवान दिल्लो परवानो दुसर्या मनशाक हस्तांतरीत करपाची मेकळीक आसा. भितरल्या अंतर्गत बंदर कायद्या खाला बोटीचे सुवातेर व्हडले बोटीची तरतूद ना. एखादी बोट बदलपाक जरी मेळटा तरी ते आदले बोटीच्या परवान्याच्या समान अटीं प्रमाण आसपाक जाय. सरकारान सध्या बोट चलोवपी मनशाक दिल्लो मूळ परवानो उक्तो करचो. सरकारांत मंत्री आशिल्ल्या पणजेच्या आमदारान ताचें नांव उक्तें करचें, अशी मागणी इनफ इज इनफचे निमंत्रक आदले न्यायाधीश फेर्दिन रिबेलो हांणी केली. कॅसिनो विरोधांतले चळवळीक इनफ इड इनफ संघटणेन पुराय फाटबळ जाहीर केलां. धर्मीक फुडार्यांनी आतां कॅसिनो आड जागृती करपाची गरज आशिल्ल्याचेंय रिबलो हांणी म्हणलें.
हे विशींचें पत्र आदले न्यायाधीश फेर्दिन रिबेलो हांणी पोणजेकार अगेन्स्ट कॅसिनोज संघटणेक धाडलां. भितरलो जहाज कायदो आनी भारतीय बंदर कायद्या खाला प्रदूशण प्रतिबंधक उपाय पुराय करप गरजेचें. दुर्दैवान, फाटल्या सरकारांनी आपली राजधानी पणजीक भारताची कॅसिनो राजधानी केलें. हाचो मांडवी न्हंयेच्या कांठार आनी ताचे पलतडीं रावपी दरेकल्याचेर परिणाम जाला. मांडवी न्हंयेंत आशिल्ल्या स बोटींक लागून पर्यावरणाचेर परिणाम जाला. भारतीय बंदर कायदो, २०२५ च्या तरतुदींनुसार प्रत्येक बंदरात कोयरा खातीर बंदर आधारित स्वागत आनी हाताळणी योजना गरजेची. पूण ती ना. अंतर्गत जहाज कायदो, २०२१ चे तरतुदीं प्रमाण, बंदरांत प्रवेश करपी दरेका बोटीं सयत सद्याच्या बोटींक दर्यादेगांवेल्या स्वागत सुविधांचेर कोयर उडोवचो पडटा आनी प्रदुशण प्रतिबंध नियम २०२२ प्रमाण भितरल्या बोटीं मदीं निश्चीत केल्ले नेम पुराय करचे पडटात. कॅसिनो बोटी हे नेम पाळटात काय ना हाची म्हायती सरकारान दिवपाक जाय. भारतीय बंदर कायदो, २०२५ खाला आयुक्त नियुक्त करप गरजेचें.
१९९२त सरकारान पयलेच फावटीं गोंय भौशीक जुगार कायद्याचें कलम १३ अ लागू केलें, हाका लागून ही समस्या निर्माण जाली. ह्या कलमा वरवीं सरकार फायव्ह स्टार हॉटेल्सांत इलॅक्ट्रॉनीक मनोरंजन / स्लॉट मशीनांचो खंयचोय खेळ अधिकृत करपाक शकता. ही स्थिती आयज मेरेन कायम आसा. फायव्ह स्टार हॉटेल्सांनी फकत इलॅक्ट्रॉनीक मनोरंजन आनी स्लॉट मशीनाचो खेळ खेळूं येता. मांडवी न्हंयेंतल्यान कॅसिनो काडून उडोवपाचें आस्वासन दिवन सरकार सत्तेर आयलां. उपरांत सरकारांनी फकत तांचीं आस्वासनां मोडूंक ना, जाल्यार मांडवी न्हंयेंत तांचें अस्तित्व कायदेशीर केलें, अशें निवृत्त न्यायाधीश फेर्दिन रिबेलो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
