भांगरभूंय | प्रतिनिधी
पणजी : आयज आमी पणजेकार पॅनला वतीन कांय जाणांनी उमेदवारी अर्ज भरला. फाल्यां हेर उमेदवारूय अर्ज भरतले. आमी वट्ट २८ उमेदवार दितले. कॅसिनोक लागून शारांत जावपी समस्या सोडोवपाक प्राधान्य दितले. पणजीकरांक बदल जाय. ताका लागून महापालिका वेंचणुकेंत आमच्या पॅनेलाक फाटबळ मेळटलें असो विस्वास उत्पल पर्रीकार हांणी उक्तायला. सोमारा तांच्या पॅनला वतीन चार जाणांनी उमेदवारी अर्ज दाखल केले. उपरांत तांणी माध्यमां कडेन संवाद सादलो.
कॅसिनोक लागून पणजेकारांक त्रास सोसचे पडटात. शारांतल्या मोलादीक सुविधांचेर ताण येता. कॅसिनोक लागून शारांत येरादारी कोयंडी, पार्किंग समस्या निर्माण जाल्या. तशेंच हेर समस्या सोडोवपाचो आमी पुरायेन यत्न करतले. ह्यो समस्या सोडोवपा खातीर सरकारान पणजे खातीर विशेश निधी दिवंक जाय. पार्किंगांत कांय सुवातो थळाव्यां खातीर आरक्षीत आसपाक जाय. पे पार्किंगच्यान येवपी महसुलांतल्या पणजे मुळाव्यो सुविधा उपलब्ध करप गरजेचें. हे विशींय आमी यत्न करतले, अशें पर्रीकार हांणी म्हणलें.
आमी आमच्या पॅनलाच्या उमेदवारांची वळेरी बेगीनूच जाहीर करतले. दोन सुवातांचेर आमी स्वतंत्र लढपी उमेदवारांक फाटबळ दितले. पक्ष, विचारसरणी हाचे परस आमी उमेदवार पणजी खातीर योग्य आसा काय हाचो विचार करून उमेदवारी दिली.पारदर्शक प्रशासन आनी भ्रश्टाचारमुक्त पणजी हें आमचें ध्येय. आमचे कांय उमेदवार तरणाटे जाल्यार कांय अणभवी आसात. आमी पणजेच्या बर्या खातीर १० मुद्दे घेतल्यात. हातुंतल्या चडांत चड मुद्यांक फाटबळ दिवप्यांक आमी उमेदवारी दिल्या.
‘सोमारा २२ अर्ज
सोमारा वट्ट २२ जाणांनी अर्ज दाखल केले. हातूंत ‘आमी पणजेकार’च्या स जाणांचो आसपाव आसा. हातूंत नंबर ६ तल्यान डॉ.शीतल नायक, प्रभाग नंबर १० तल्यान ऍड. विष्णू नायक, प्रभाग नंबर १२ तल्यान शबमन खान, प्रभाग नंबर १३ तल्यान नरेश चारी, प्रभाग नंबर १६ तल्यान प्रांजल नायक जाल्यार प्रभाग नंबर ३० तल्यान प्रभाग नंबर ७ तल्यान लियोनिड फुर्तादो हांणी अर्ज भरले. जाल्यार प्रभाग ४ तल्यान जॉन पो हांणी अर्ज दाखल केलो. ते महापौर रोहित मोन्सेरात हांचे आड लढटले. जॉन हांकां आमी पणजेकारान तेंको दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
