भांगरभूंय | प्रतिनिधी
मुख्यमंत्री डॉ. प्रमोद सावंत हांची विधानसभेंत गवाय
पणजी: कॅसिनोंच्या उरिल्ल्या महसुला पैकीं 250 कोटींचो महसूल येता त्या 31 मार्च मेरेन वसूल करतले. कांय प्रकरणां न्यायालयांत तशेंच लवादा कडेन आसात. तांच्या निवाड्या उपरांत तीन म्हयन्यांत उरिल्ली शंबर कोटींच्या महसुलाचीय वसुली करतले अशी हमी मुख्यमंत्री डॉ. प्रमोद सावंत हांणी मंगळारा विधानसभेंत उलयतना दिली.
विरोधी पक्ष फुडारी युरी आलेमाव हांणी प्रस्नोत्तराच्या वराक हे विशींचो प्रस्न उपस्थीत केल्लो. कॅसिनों कडेन उरिल्लो सुमार 350 कोटींचो महसूल सरकार कित्याक वसूल करिना? लायव्ह गेमींग सुरू आशिल्ल्या कॅसिनोंचेर कारवाय कित्याक जायना? कॅसिनों खातीर गॅमींग आयुक्ताची नेमणूक कित्याक जायना अशे प्रस्न आलेमांव हांणी उपस्थीत केल्ले. आमदार व्हेंझी व्हिएगश, एल्टन डिकॉस्टा हांणीय तांकां तेंको दिलो.
मजगतीं, युरी आलेमांव हांच्या प्रस्नांक जाप दितना, ज्या कॅसिनों कडल्यान महसूल उरला तो तांचे कडल्यान वसूल करपाची प्रक्रिया सुरू आसा. उरिल्ल्या महसूला पैकीं 250 कोटींचो महसूल येता त्या 31 मार्च मेरेन वसूल करतले. कांय कॅसिनोंची प्रकरणां न्यायालय तशेंच लवादा कडेन आसात. थंयच्या निवाड्या उपरांत तीन म्हयन्यांत तांचे कडल्यानूय उरिल्ल्या शंबर कोटींचो महसूल वसूल करतले अशें मुख्यमंत्री डॉ. प्रमोद सावंत हांणी सांगलें.
लायव्ह गेमींग सुरू आशिल्ल्याच्यो कागाळी ज्या कॅसिनों विशीं आयल्यात तांचे परवाने कांय काळा खातीर निलंबीत केल्यात. तशेंच सरकारान गेमींग आयुक्त म्हूण जीएसटी आयुक्तांची नेमणूक केल्या अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
