भांगरभूंय | प्रतिनिधी
राज्य मंत्रीमंडळाचे बसकेंत निर्णय जाल्ल्याची मुख्यमंत्र्यांची म्हायती
पणजी: मांडवी न्हंयेंतल्या कॅसिनोंक मार्च 2027 मेरेन मुजतवाड दिवपाचो निर्णय बुधवारा जाल्ले राज्य मंत्रीमंडळाचे बसकेंत घेतिल्ल्याची म्हायती मुख्यमंत्री डॉ. प्रमोद सावंत हांणी बसके उपरांत घेतिल्ले पत्रकार परिशदेंत उलयतना दिली.
मंत्री मॉवीन गुदिन्हो ह्या वेळार तांचे सयत हाजीर आशिल्ले. मांडवी न्हंयेंतल्या कॅसिनोंक दर स म्हयन्यांनी मुजतवाड दिताले. बुधवाराचे मंत्रीमंडळ बसकेंत मात ह्या कॅसिनोंक मार्च 2007 मेरेन मुजतवाड दिवपाचो निर्णय घेतला अशें मुख्यमंत्री डॉ. प्रमोद सावंत हांणी सांगलें. मांडवी न्हंयेंतल्या कॅसिनोंचो विशय दर विधानसभा वेंचणुकांनी चर्चेक येता. पूण, ह्या कॅसिनोंक दरवर्सा देश-विदेशांतले लाखांनी पर्यटक भेट दीत आसतात.
तशेंच कॅसिनोंच्या माध्यमांतल्यान सरकाराचे तिजोरेंत दरवर्सा कोट्यांनी रुपयांचो महसूल एकठांय जायत आसता. ताका लागून फाटल्या वर्सां सावन सरकारा कडल्यान कॅसिनोंक मुजतवाड दितात.
अर्थसंकल्पीय अधिवेशन 6 फेब्रुवारी सावन
राज्य विधानसभेंचें अर्थसंकल्पीय अधिवेशन येता त्या 6 फेब्रुवारी सावन सुरू जातलें अशी म्हायती मुख्यमंत्री डॉ. प्रमोद सावंत हांणी ह्या वेळार उलयतना दिली. राज्यपालांच्या अभिभाशणान अर्थसंकल्पीय अधिवेशनाक सुरवात जातली आनी अधिवेशन कितले दीस घेवचें हाचो निर्णय फुडल्या कांय दिसांत घेतले अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
