भांगरभूंय | प्रतिनिधी
फाटल्या काय दिसां सावन गोंयात एक प्रकरण सारकें गाजता, तें म्हणल्यार कॅश फॉर जॉब. कोणाक तरी पयशे दिवन नोकरी विकत घेवप ही गजाल गोंयात तरी नवी न्हय. दरेका गोंयकाराक खबर आसा की गोंयांत पयशे दिना जाल्यार सरकारी नोकरी मेळना…. आनी आपल्या भुरग्यांक सरकारी नोकरी मेळची म्हूण पालक पयलींच सावन पयशांची वेवस्था करून दवरपाक लागतात. ही गोंयची आतांची परिस्थिती. हाका जरी कांय पुरावे नासले तरी दरेक गोंयकार जाणा… ह्यो गजाली पुराव्यांनी चलनात, त्यो विश्वासाचेर चलतात.
फाटले कांय दीस गोंयांत सरकारी नोकऱ्यो दिवपाच्या नांवान कांय जाणांनी लोकांक कोट्यांनी रूपयांच्यो तोपयो घाल्ल्याचीं प्रकरणां उक्तडार येवपाक लागल्यांत. पुलीस तांचो तपास करतात. सद्या पुलिसांचे गरयेक लागल्यांत तीं ल्हान- ल्हान नुस्तीं. तांचे गॉड फादर हीं व्हडलीं नुस्तीं… तीं पुलिसांचे गरयेक कशींच लागचीं ना, हीय गजाल एकान एक गोंयकाराक खबर आसा. कारण गोंयकार तशें हुशार. कोणाक पयशे दिल्यार सरकारी नोकरी मेळटा आनी तो मनीस ते पयशे व्हरून आनीक कोणाक दिता हें तर ते मनीस पयशे घेताना सरळ- सरळ सांगतात. त्याच विस्वासाचेर लोक तांकां पयशे दितात. आतां पळोवंक गेल्यार ज्या लोकांनी पयशे घेतल्यात ते कांय राजकारणी न्हय. ते कोणूच न्हय. जाल्यार ते कशे नोकरी दिवपाक शकतात, हो प्रस्न गोंयकारांक पडचो ना अशें जावंकूच शकना. तांणी खंयच्या तरी मनश्याचें नांव सांगलां आनी आपल्याक सरकारी नोकरी मेळटली हे आशेन लोकांनी इतले लाख दिल्यात.
हे पयशे कोणाक वताले आनी सरकारी नोकरी कोण विकतालो हाचो सोद पुलीस लायतले, अशें दिसना. कारण इतलेंच की हेंच पुलीस कोणाक तरी पयशे दिवन कामाक लागल्यात!!! ते आतां ह्या प्रकरणाची चवकशी कशी करूं शकतात? आनी आमी जेन्ना अशें म्हणटा की पुलीस पयशे दिवन कामाक लागल्यात ताचें कारणूय तशेंच. आदले दीस पुलीस कॉन्स्टेबलाचे परिक्षेक 18 मार्क घेवपी उमेदवारांक दुसरे दीस पीएसआयचे परिक्षेक 99 मार्क कशे पडटात? हाची जाप पयली सरकाराक दिवची पडटली. ताणें कोणाक पयशे दिल्ले? ताच्या कडच्यान कोणें पयशे घेतले? आनी कोणाक पावयले, आनी तेका नोकरी कोणें दिली? हाच्यो जापो कोण दितलो? ह्या प्रस्नाच्यो जापो सगळ्या गोंयकारांक खबर आसात. पुलिसांनी आनीक कितें वेगळे सांगपाक जाय? दरेक पुलिसान प्रामाणीकपणान स्वताक विचारचें, जर ताणें कोणाक तरी पयशे दिवन नाशिल्ले जाल्यार तांकां आयज नोकरी मेळपाची काय? लोकांक उघडपणान तें ना सांगू, पूण पुलिसांक सगळें खबर आसा…. आनी लोकांक खबर ना अशें जावपाकूच शकना.
गांवांत कोणाकूय सरकारी नोकरी लागली की लोक गाड्यार बसून गजाली करतात की ताणें कोणाक कितले पयशे दिले. ह्यो गजाली फटीच्यो आसपाक शकनात. कांय आमदार, मंत्री उघडपणान पयशे मागतात आनी ते सांगतातूय. फुडले वेंचणुकेक आपल्याक पयशे मोडपाक जाय, लोकांक पयशे दिल्यारूच लोक मतां मारतले. सगळ्यांक नोकऱ्यो दिवपाकूंच शकना. नोकरी ना तांकां पयशे तरी दिवपाक जाय. आतां तांचें फट कशें म्हणटलो? गोंयांत तरी कॅश फॉर जॉब प्रकरणा बंद करपाक शक्य ना इतल्याचेर पावलां. आतां कोणाक जबाबदार धरप हें तांचें ताणें थारावचें. जीं प्रकरणां उक्ताडार आयल्यांत तांचें कायद्यान कांयच जावपाचें ना इतलें मात खरें. कारण पयशे घेवपी जबाबदार तितलोच पयशे दिवपी लेगीत. जेन्ना पयशे दिवप्यांक ही गजाल पुलीस विचारतले तेन्ना सगळे केशी फाटीं घेवन मेकळे जातले. हें प्रकरण उक्ताडार आयलां तातूल्यांन शेवटाक कोणाचेंच कांय जावपाचें ना इतलें मात खरें.
पुलीस खंय योग्य दिशेन चवकशी करतात. लोकांक ही गजाल कशीच पटपाची ना. कारण जर योग्य तरेन चवकशी करतात जाल्यार कांय आमदार, मंत्री उघडपडणान विधाना करतात की आपणें अशी नोकरी दिली आनी तशी नोकरी दिली. तांणी कशी नोकरी दिली ताची चवकशी कित्याक जायना? एका वेळार एका मंत्र्यान सागिल्लें की नोकरी दिवपाक दुसऱ्या मंत्र्यान पयशे घेतल्यांत. आपले कडेन ताचे पुरावेय आसात. तेन्ना त्या मंत्र्याची चवकशी कित्याक जाली ना? त्या मंत्र्याची जर तेन्ना चवकशी जाल्ली जाल्यार आयज गोंयकारांक कोण कोटींची तोपी घालचो नाशिल्लो. कांय आमदार- मंत्री खरेंच नोकरेचे पयशे घेनात. पूण कांय जाण उघडपणान घेतात हें गोंयकारांक तरी वेगळें सांगपाची गरज ना. ह्या सगळ्या प्रकरणातल्यांन एक स्पश्ट जाता की शेवटाक कांयच जावपाचें ना.
ज्ञानेश्वर वरक
9403541232
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
