भांगरभूंय | प्रतिनिधी
सरकारी नोकरेचें हांयस दाखोवन कांय तरणाट्यांची फटवणूक जाल्या. नोकरे खातीर कांय जाणांनी बँकेचें रीण घेवन , भांगरां शिंगरां विकून, जमीन घाणाक दवरून लाखांनी रुपयांची पुंजी ह्या ठकसेनांक दिल्या.
सध्या गोंयांत कॅश फाॅर जाॅब ही लुटमारीची लागण लागिल्ली आसा. सरकारी नोकरेचें आमिष दाखोवन कोटी रुपयांची तोपी घालपाचें नवें सत्र चालू आसा. हातूंत शाळेची मुख्याध्यापकूय आडकल्या. हे लागणीचो बुन्यादी फांतर तिचे हस्तुकीं बसलो. तिच्या हाता खाला उच्च पदाचेर नोकरी करपी कमिशन एजंट लोक चड करून राजकारण्यांच्या फाटल्यान भोंविल्ले दिसतात. दिसान दीस ह्या कमिशन एजंटांचो आंकडो वाडत आसा. कोट्यांनी रुपया लुटून कोट्यांनी रुपयांची मालमत्ता जमोवपी, वर्साक दोन फावटी विदेशांत पिकनिकेक वचपी, आलिशान बंगलो, म्हारग्यो गाडयो, बँकेंत भांगराच्यो वस्ती… लोकांक तोपी घालून आपली तिजोरी भरीत आसा.
हेर लोकूय हे दलालींत वांटेकार आसात. नोकरी करून राब राब राबचे परस लोकांक नोकरेचें हांयस दाखोवन पुजा नायका सारके करोडांनी रुपया जमोवप फायद्याचें आसा, अशें नवे पिळगेक दिसपाक लागलां. हें जाळें खूब पयस मेरेन पातळिल्लें आसा.
हातूंत तिनश्यां वयर तरी एजंट आसतले. ह्या धंद्यांत शाळांचे नामनेचे शिक्षक पसून वांटेकार आसात. ते एजंट म्हूण काम करतात आनी कमिशनूय खातात. नोकरेचें हांयस दाखोवन लाखांनी रुपयांची लांच घेतात. ज्या शिक्षकाक देवा समान मानतात, ते ठकसेन जातात, ही खरेंच दुर्दैवाची गजाल.
सरकारी नोकरेचें हांयस दाखोवन कांय तरणाट्यांची फटवणूक जाल्या. नोकरे खातीर कांय जाणांनी बँकेचें रीण घेवन , भांगरां शिंगरां विकून, जमीन घाणाक दवरून लाखांनी रुपयांची पुंजी ह्या ठकसेनांक दिल्या. सरकारी नोकरी म्हणजे भांगराचे तांती दिवपी कोंबी अशें जण एकलो समजता. भरमसाठ पगार, पांच दीस काम, पोटभर सुटयो. वर्साचे कामाचे दीस 135. केन्नाय नोकरे वच, बेगीन घरा यो. म्हारगाय भत्तो, सातवो वेतन आयोग, दिवाळेचो बोनस. कांय जाणांक आॅफिस म्हणल्यार धर्मशाळा. कामाचो ताण ना. पांय सोडून बस, मोबायलाचेर गेमी खेळ, विचारणारो कोण ना…. असो विचार करून लोकांनी ह्या ठकसेनांक मागती ती रक्कम दिली. कॅश फाॅर जाॅब ह्या चपक्यांत सांपडिल्ल्या लोकांनी जाता तितले बेगीन वचून सरकाराक, पुलिशेक खरी म्हायती दिवप ही आयच्या काळाची गरज आसा. मायबाप सरकार हाचेर तोडगो काडटलेच. असल्या ठकसेन दलालाक समाजांतल्या बहिश्कृत कराक जाय. समाजांतल्यो असल्यो किडी चिड्डून उडोवपाक जाय. तरणाट्यांनी अशे पयशे दिवन नोकरे मेळोवचे परस कश्ट करून अभ्यास करचो. बरे गुण घेवचे. आपशीच बरी नोकरी मेळटली.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
