भांगरभूंय | प्रतिनिधी
खबरां संस्ता
दोहाः ब्राझिलाक फिफा संवसारीक फुटबॉल सर्तींत अपराजीत रावपाक अपेश आयलें. साखळे फेरयेंतले निमणे मॅचीत कॅमेरुनान भरपायेच्या वेळांत गोल करून ब्राझिलाचेर एकसुऱ्या गोलान इतिहासीक जैत मेळयलें. ब्राझिलाचेर जैत मेळोवपी कॅमरून हो पयलोच आफ्रिकन पंगड थारलो.
अ गटांतल्या ह्या निकालाचो व्हडलोसो परिणाम गुण क्रमवारींत जालो ना. ब्राझिलान ह्या गटांत आपली पयली सुवात कायम राखल्या. ह्या गटांतल्या दुसरे एके मॅचींत
स्वित्झर्लंडान सर्बियाचेर 3-2 अशें जैत मेळोवन बाद फेरयेंत प्रवेश केलो.
ब्राझील- कॅमरून हाचे मदलो खेळ सुपर फास्ट जालो. ब्राझिलाचें खेळाचेर वर्चस्व आशिल्लें. मात कॅमरूनान प्रती आक्रमण करतना ब्राझिलाक घुस्पायलें. मॅचींतले भरपायेच्या खेळांत दुसऱ्याच मिनटांत कॅप्टन आनी फॉरवर्ड फळयेंतल्या विन्सेट अबुवाकारान गोल करून कॅमरूनाक जैत मेळोवन दिलें.
स्वित्झर्लंडांत 20 व्या मिनटाक अणभवी झार्डान शकिरीच्या गोलान सर्बियाचेर आघाडी घेतली. अॅलेक्झांडर मित्रोव्हिचान 26व्या मिनटाक हेडरान गोल करून सर्बियाक गोल बोरोबोरी करून दिली. ते उपरांत डुसान व्लाहोव्हिचान 35व्या मिनटाक गोल करून सर्बियाक आघाडी मेळोवन दिली. हाफ वेळाचो खेल सोपपाक एक मिनीट आसतना ब्रील एम्बोलोनेन स्वित्झर्लंडाक बोरोबोरी करून दिली. दुसऱ्या हाफांचे सुरवेक रुबेन व्हर्गासान बॉलाचेर ताबो मेळोवन रेमो फ्रुएलेरराक पास दिलो आनी ताणे ताचो फायदो घेवन स्वित्झर्लंडाक जैत मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
