भांगरभूंय | प्रतिनिधी
हळदोण्यां पांच जाणां मदीं दिसलीं लक्षणां
भांगरभूंय । प्रतिनिधी
पणजी : गोंय वैजकी म्हाविद्यालय (गोमॅकॉ), दांत म्हाविद्यालय आनी भलायकी खातें हांच्या जोडपालवान शुक्रारा हळदोणें मतदारसंघांत आयोजीत केल्ल्या फुकट कॅन्सर स्क्रिनींग मोहिमेंत पांच जाणां मदीं कॅन्सराचीं लक्षणां दिसलीं. तांचेर तत्काळ उपचार सुरू जाल्ल्यान आतां मेरेन 13 मोहिमेंतल्यान वट्ट 65 जाणांचे जीव वाटावपाक येस आयलां.
गोमॅकॉच्या कम्युनिटी विभागाचे मुखेली तशेंच मोहिमेचे नोडल अधिकारी डॉ. जगदीश काकोडकार हांच्या फुडारपणा खालच्या पंगडान कॅन्सर स्क्रिनींग मोहिमे खाला फाटल्या कांय म्हयन्यां सावन मंडूर, वाळपय, कुडचडें, सांखळी, पोरणें गोंय, काणकोण, सांगें, दिवचल, पेडणें, शिरोडें ह्या वाठारांनी वचीन मोबायल डिटेक्शन व्हॅनीच्या माध्यमांतल्यान थळाव्या लोकांची फुकट तपासणी केली.
शुक्रारा ह्या व्हॅनीच्या माध्यमांतल्यान हळदोण्यां तपासणी केली. थंयच्या 95 दादले आनी 160 बायलां मेळून 255 जाणांची तपासणी केली. तातूंत दोन बायलां मदीं थानांचीं, दोगां मदीं तोंडाचीं जाल्यार एकले मदीं आतड्याच्या कॅन्सराचीं लक्षणां दिसलीं, अशी म्हायती डॉ. काकोडकार हांणी दिली.
आतां मेरेन 13 कडेन जाल्ल्या मोहिमेंत 2,780 जाणांची फुकट तपासणी केली. तातूंत 13 जाणांक कॅन्सर जाल्ल्याचें निदान जालां, 52 जाणां मदीं कॅन्सराचीं लक्षणां दिसल्यांत. ह्या सगळ्यांचेर सध्या हॉस्पिटलांत उपचार चालू आशिल्ल्यान तांकां वाटावपाक येस आयलां, अशें डॉ. काकोडकार हांणी स्पश्ट केलें.
हळदोण्यां दरवर्सा मोहीम घेवचीः फेरेरा
सरकारी वा खाजगी हॉस्पिटलांनी कॅन्सराचें उपचार घेतना खूबश्या दोतोरांक मेळचें पडटा. ते खातीर तांकां वेगवेगळ्या रांकेंत उबें रावचें पडटा. पूण कॅन्सर स्क्रिनींग मोहिमेंत एकाच वेलार 25 तज्ञ दोतोरां कडल्यान दुयेंतीची तपासणी जाता. ताका लागून ही मोहीम खूब जाणां खातीर वरदान थारता. अशे तरेची मोहीम दरवर्सा हळदोण्यां घेवची, अशी मागणी हळदोणेंचे आमदार अॅड. कार्लोस फेरारा हांणी केली.
बाणावले 28 फेब्रुवारीक मोहीम
फुकट कॅन्सर स्क्रिनींग मोहिमेक गोंयभरांतल्यान उत्स्फूर्त प्रतिसाद मेळटा. बाणावलेचे आमदार व्हेन्झी व्हिएगश हांणी लेगीत बाणावले मोहीम आयोजीत करपाची मागणी केल्या. ते प्रमाण थंय 28 फेब्रुवारीक मोहीम आयोजीत करतले, अशें डॉ. जगदीश काकोडकार हांणी सांगलें. हाचे वयल्यान सत्तेर आशिल्ल्या आमदारां वांगडाच विरोधी आमदार लेगीत हे मोहिमेचेर खोशी आशिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
