भांगरभूंय | प्रतिनिधी
टाटा मेमोरीयल आनी ऑक्सफर्ड विद्यापीठाच्या सहकार्यान भलायकी खात्याचो उपक्रम
पणजी : कॅन्सर, किडणी, गोडेंमुताचें तशेंच हेर गंभीर दुयेसां विशीं (एनसीडी) अभ्यास आनी संशोधना संबंधीच्या लॉंजीट्युडीनल कोहोर्ट स्टडी उपक्रमाचें मुख्यमंत्री डॉ. प्रमोद सावंत हांचे हस्तुकीं उक्तावण जालें. कॅन्सर, किडणी, गोडेंमूत ह्या दुयेसांचें प्रमाण, ताचीं कारणां हे विशींचीय म्हायती अभ्यासा उपरांत उपलब्ध जातली. संशोधनाक लागून भलायकेचें धोरण आखपा सयत निधीची तरतूद करप शक्य जातलें. ह्या संशोधना खातीर अर्थसंकल्पांत अर्भीक तरतूद करतले अशी म्हायती डॉ. सावंत हांणी दिली.
टाटा मेमोरीयल हॉस्पिटल आनी ऑक्सफर्ड विद्यापीठ हांचे मजतीन भलायकी खातें संशोधन करतलें. पर्वरी मंत्रालयांत उपक्रमाचो शुभारंभ करचे पयलीं मुख्यमंत्र्यांनी भलायकी खातें, टाटा मेमोरीयल हॉस्पिटल आनी ऑक्सफर्ड विद्यापीठाच्या अधिकार्यां कडेन बसका घेतली. भलायकी खात्याची संचालक डॉ. रूपा नायक, डॉ. शेखर साळकार, गोंय वैजकी महाविद्यालय हॉस्पिटलाचे डीन डॉ. शिवानंद बांदेकार, मुखेल सचीव वी. कांडावेलू आनी हेर अधिकारी बसकेक हजर आशिल्ले.
गोंयांत कॅन्सर, डायबेटीस (गोडेंमूत) तशेंच हेर दुयेंसांचें प्रमाण वाडतूच आसा. हीं दुयेंसां जावपा फाटलीं कारणां कितें? दुयेंसाचें नेमकें प्रमाण कितलें? प्रमाण उणें करपा खातीर उपाय खंयचे? हाचे अभ्यास जावपाची गरज आसा. हाका लागून भलायके विशींची आकडेवारी आनी अचूक म्हायती उपलब्ध जातली. लॉजीट्युडीनल कोहोर्ट स्टडी उपक्रमा खाला अभ्यास तशेंच संशोधन जातलें. हाका लागून उपचार तशेंच प्रतिबंदात्मक उपाय येवजण करप शक्य जातली. गोंयच्या दरेका नागरिकाक भलायके विशीं उत्कृश्ठ सेवा दिवपाचो सरकाराचो यत्न आसा. हाचे खातीर सुविधा तयार करपा सयत कुशळ मनीसबळ उपलब्ध करपाची गरज आसा. ह्या सगल्या गजालीं खतीर हो उपक्रम पुरो जातलो अशें मुख्यमंत्री डॉ. प्रमोद सावंत हांणी म्हणलें.
कोहोर्ट स्टडी हो गोवा केरस २०२५ खाला सुरू जावप उपक्रम. वाळपय, सांखळे, मडगांव, काणकोणां तशेंच दर्यादेग वाठारांतले जनतेचे रगताचे नमुने घेतले. रगताचे नमुने घेवपा वांगडा वजन तशेंच हेर गरजेच्या घटकांची तपासणी करतले. हे नमुने टाटा मेमोरीयल हॉस्पिटल, मुंबय धाडटले. रगताचे नमुने आनी हेर तपशीलाच्या आदाराचेर अभ्यास करतले, अशी म्हायती डॉ. शेखर साळकार हांणी दिली.
कॅन्सर, डायबेटीस, हायपरटेंशन हीं दुयेंसां एकाच कुटुंबांतल्या जायत्या जाणांक जाल्ल्याचीं उदाहरणां आसात. हाचीं कारणां अनुवंशीक आसात काय जीणे पद्धती कडेन संबंधीत आसात, हाचो अभ्यास जावपाची गरज आसा. ह्या उपक्रमाक लागून हो अभ्यास जातलो अशें भलायकी खात्याची संचालक डॉ. नायक हांणी सांगलें. ह्या उपक्रमाचो आतां गोंयांत शुभारंभ जरी जाला, तरी पुराय भारतांत संशोधन जातलें. हाका लागून दुयेंसाचीं कारणां, प्रमाण हे विशींची म्हायती डीजीटल स्वरूपांत तयार जातली अशें डॉ. राजेश दिक्षीत हांणी म्हणलें.
गोंय वैजकी महाविद्यालयाचे डीन डॉ. शिवानंद बांदेकार आनी मुखेल सचिव वी. कांडावेलू हांचींय ह्या वेळार भाशणां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
