भांगरभूंय | प्रतिनिधी
मंत्री विश्वजीत राणे: ‘फुफ्फुसाच्या कॅन्सर’ तपासणे खातीर कबलात
पणजी : कॅन्सरा सयत हेर गंभीर दुयेंसांवेलीं वखदां ५० ते ६० टक्के सवाय दरांत उपलब्ध करपाची प्रक्रीया भलायकी संचालनालयान सुरू केल्या. असो प्रस्ताव सरकाराक सादर केला. गोंय वैजकी महाविद्यालय हॉस्पिटलांत लंग्स (फुफ्फुस) कॅन्सरचे तपासणे खातीर ऍस्ट्रा झेनेका वांगडा आशिल्ल्या सामंजस्य कराराराचो (एमओयू) विस्तार केला, अशी भलायकी मंत्री विश्वजीत राणे हांणी म्हायती दिली.
श्री. राणे हांणी पणजे पत्रकार परिशद घेतली. कॉन्फीडेंशिअलीटी प्रायसींग उपक्रमा खाला कंपन्यां कडल्यान ५० ते ६० टक्के सवाय दरांत वखदां उपलब्ध जातात. भलायकी संचालनालयान ह्या प्रस्तावा विशीं चार ते पांच कंपन्यां कडेन उलोवप केलां. ह्या उपक्रमा खाला वखदां विकत घेवपा खातीर मंत्रिमंडळाची मान्यताय घेवप गरजेचें. भलायकी खात्यान हे विशींचो प्रस्ताव सरकाराक सादर केला. खात्याक सवाय दरात वखदां उपलब्ध जाल्यार दुयेतींकूय तीं सवाय दिवप शक्य जातलें. कॅन्सराचीं वखदां बरींच म्हारग आसतात. हाका लागून उपचाराकूय बरोच खर्च जाता, अशें तांणी म्हणलें.
गोंय वैजकी महाविद्यालयांत लंग्स (फुफ्फुस) कॅन्सरची तपासणी जातली. दुयेंती एक्सरे काडपाक येतात, तेन्ना ही तपासणी करतले. हाका लागून ऍस्ट्रा झेनेका वांगडा जी कबलात (एमओयू) केल्या, तिचो विस्तार करतले, अशी म्हायती श्री. राणे हांणी दिली.
२०२६ मेरेन कॅन्सर हॉस्पिटल जातलें पुराय
कॅन्सर हॉस्पिटल इमारतीचें काम नेटान चालू आसा. २०२६ मेरेन हॉस्पिटल सुरू जातलें. इमारतीचे पयले माळयेच्या स्लॅबाचें काम पुराय जालां. हॉस्पिटलांत प्रोटोन थेरपी केंद्रूय जातलें. ताचो शेजारच्या राज्यांतल्या दुयेतींकूय लाव जातलो. प्रधानमंत्री नरेंद्र मोदी आनी केंद्रीय भलायकी मंत्री जे. पी. नड्डा हांच्या फाटबळाक लागूनच राज्यांत कॅन्सर हॉस्पिटल उबारप शक्य जातलें अशें मंत्री विश्वजीत राणे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
