भांगरभूंय | प्रतिनिधी
पणजी ः कॅनरा बँकेच्या 7 कोटी रुपयांच्या फटवणूक प्रकरणांत कारवाय केल्या. पणजेच्या अंमलबजावणी संचालनालयान (ईडी) मनी लाॅड्रिंग प्रतिबंधक कायद्या खाला दक्षीण गोंयांत 2.86 कोटी रुपयांची स्थावर मालमत्ता तात्पुरती जप्त केल्या. हे मालमत्तेंत 22 भूखंड, दोन जमनीचे प्लॉट आनी एक आलीशान रो व्हिला आसा.
ही कारवाय क्रावन मिनरल्स ट्रेडिंग कॉर्पोरेशन आनी तांच्या भागीदारांचेर केल्या. सीबीआय एफआयआर आनी आरोपपत्राचेर आदारून ईडीन चवकशी सुरू केल्या. ह्या भागीदारांनी कच्चे लोखण (raw iron) वेवसायाच्या नांवान कॅनरा बँके कडल्यान 7 कोटी रुपयाचें ओपन कॅश क्रेडिट रीण घेतिल्लें. पूण हे रीण तांणी बनावट कागदपत्रां सादर करून आनी हेर बँकां कडेन पयलींच घाणाक दवरिल्ल्या मालमत्तेची कागदपत्रां परतून घाणाक दवरिल्ल्याचें उक्तें जालें.
रिणाची रक्कम रोखडीच बनावट वेवसायीक वेव्हारा वरवीं वैयक्तीक बँक खात्यांत वळयली. ह्या गुन्यांवकारी माध्यमांतल्यान मेळिल्ले पयशे संबंदीत स्वताच्या वैयक्तीक खातीर आनी नवी स्थावर मालमत्ता खरेदी करपा खातीर वापरताले. ईडीन जप्त केल्ल्या मालमत्तेंत भागीदार रियाज शेख हांच्यो धारबांदोड्यांतल्यो 22 जमनी, जाल्यार वेवस्थापकीय भागीदार आदित्य आंगले हांचे कुंकळ्ळीतले दोन जमनींचे प्लॉट आनी फातोड्डेंतलो आलीशान रो व्हिला तात्पुरतो जप्त केला.
ह्या फटवणूक प्रकरणांतलो सगळो काळो पयसो (प्रोसिड्स ऑफ क्रायम) 7 कोटी रुपया आसा. तातूंतल्यान आतां मेरेन 2.86 कोटी रुपयांची मालमत्ता जप्त केल्या अशें ईडी तपासांतल्यान स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
