भांगरभूंय | प्रतिनिधी
नवी दिल्ली, खबरां संस्था ः भारतीय विद्यार्थ्यांची परदेशांत शिकपा खातीर कॅनडा ही पयली पसंत. दर वर्सा व्हड प्रमाणांत भारतीय विद्यार्थी शिक्षण आनी नोकरे खातीर कॅनडांत वतात. फाटलीं जायतीं वर्सां कॅनडांत परदेशी विद्यार्थी आनी कामगारांचो आंकडो उणो करपाचे यत्न सुरू आसा. हे संबंदीं एक नवी म्हायती मुखार आयल्या. कॅनडान 2025 वर्साच्या आतां मेरेन 80 टक्के भारतीय विद्यार्थ्यांचें व्हिसा अर्ज न्हयकारले. कॅनडांत शिकपाचो, काम करपाचो वा रावपाचो विचार आशिल्ल्या भारतीयांचो आंकडो चड आशिल्ल्यान ह्या नव्या निर्णयाचो व्हड परिणाम जावंक शकता.
भारतीय विद्यार्थ्यांचें व्हिसा न्हयकारले….
आंतरराश्ट्रीय शिक्षणा खातीर कॅनडा हो पसंतीचो देश मानतात. व्हड प्रमाणांत भारतीय लोक आपल्या शिक्षणा खातीर कॅनडा वेंचतात. कॅनडान कांय वर्सां आदीं सगळ्यांत खर व्हिसा धोरण चालीक लायलां. जाका लागून संवसारीक विद्यार्थ्यांच्या स्थलांतर पद्दतींत व्हड बदल जाला. इमिग्रेशन, रिफ्युजीज अँड सिटिझनशिप कॅनडाच्या (IRCC) आंकडेवारी प्रमाण 2025 वर्सा सुमार 80 टक्के भारतीय विद्यार्थ्यांचें व्हिसा अर्ज न्हयकारले.
कॅनडांतल्या सगळ्या आंतरराश्ट्रीय विद्यार्थ्यांतले सुमार 40 टक्के विद्यार्थी भारतीय आसात. ‘द पाय न्यूज’ (The PIE News) हे शिक्षणीक खबरां संस्थेन बॉर्डरपासाच्या (BorderPass) डेटाचो उल्लेख करून 2025 वर्साच्या दुसऱ्या तिमाहींत (Quarter 2) अर्ज केल्ल्या पांच भारतीय विद्यार्थ्यां मदल्या चार विद्यार्थ्यांचे अर्ज न्हयकारले. कॅनडा सरकाराच्या आंकडेवारी प्रमाण 2024 वर्सा 1.88 लाख भारतीय विद्यार्थ्यांक प्रवेश मेळ्ळो. व्हिसा खातीर अर्ज करतना कृत्रिम बुद्धिमत्तेचो (एआय) वापर करतात म्हणून कॅनडा विद्यार्थ्यांचे अर्ज न्हयकारता अशें मुखार आयलां.
कॅनडांत स्थलांतरितांचो आंकडो खूब वाडला
स्टॅटिस्टिक्स कॅनडाच्या मतान, तात्पुरते रावपी लोक, खास करून कामगार आनी विद्यार्थ्यांक लागून स्थलांतरीतांचो आंकडो सगळ्यांत चड वाडलां. 2022 वर्सा हो आंकडो 1.4 दशलक्ष आशिल्लो तो 2024 मेरेन 2.8 दशलक्ष जालो. फकत दोन वर्सांत हो आंकडो दुपेटीन वाडलो. स्थलांतरीत लोक वाडिल्ल्यान देशांतल्या गृहनिर्माण, समाजीक सेवा आनी वाडट्या जिणेच्या खर्चाचेरूय ताण पडपाक लागला. कॅनडा स्थलांतरीतांक व्हड प्रमाणांत सुवात दिता अशें थळाव्या लोकांचें मत आसा. कॅनडा पयलीं स्थलांतरीतांक येवकार दिवपाक सदांच तयार आसतालो, पूण आतां कॅनडांत स्थलांतरीतां आड विधानां आनी हल्ले वाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
