भांगरभूंय | प्रतिनिधी
व्हँकुव्हर, खबरां संस्था : कॅनडांत फाटले कांय दीस खलिस्तानी समर्थकांचो भारता आड निशेध चालू आसा. काल तांणी भारताच्या तिरंग्याचोय अपमान केलो. शीख फॉर जस्टिसाचे मुखेली गुरपतवंत सिंग पन्नू हाणें हो निदर्शन करपाचो उलो मारला.
एकाच दिसा कॅनडांतल्या दोन सुवातींनी निशेध जाले. पयलें निदर्शन व्हॅनकूव्हर शारांत जालें. जंय कांय खलिस्तानी समर्थक भारतीय दूतावासाच्या भायर जमले आनी निशेध करपाक लागले. खलिस्तानाक तेंको दिवन घोशणा दिल्यो. भारतीय तिरंगोय तांणी पिंजलो.
ह्या निमतान एक व्हड तिरंगी बॅनर लायिल्लो. तो खलिस्तानी समर्थकांनी जमनीर पातळ्ळो आनी ताचे वयल्यान चलून गेले. इतलेंच न्हय, प्रधानमंत्री नरेंद्र मोदी हांचो फोटोय पांयांनी माड्डून अपमान केलो.
फक्त 30 लोक
पन्नूचे वतीन भारतीय दूतावासाच्या भायर निशेध करपाचो उलो मारिल्लो. ह्या निदर्शनाक शेंकड्यांनी लोक हाजीर रावतले, अशी अपेक्षा एसएफजेन दवरिल्ली, पूण ह्या निदर्शनाक फक्त 30 लोक हाजीर आशिल्ले. कांय जाणांक पयशे दिवन हाडिल्ले.
दूतावासाच्या भायर गर्दी उणी
भारताचे खर भुमिके उपरांत भारतीय दूतावासाच्या भायर जमपी खलिस्तान समर्थकांची गर्दी दिसानदीस उणी जायत आसा. हाचे फाटल्यान भारत सरकारान घेतिल्लो म्हत्वाचो निर्णय आसा. खलिस्तानी समर्थकांचीं तोंडां वळखुपाची प्रक्रिया भारत सरकारान सुरू केल्या.
हाचे उपरांत भारत सरकार ह्या सगळ्या आंदोलकांचे ओसीआय कार्ड रद्द करपाचें आसा. ओसीआयचो अर्थ ओव्हरसीज सिटीजन ऑफ इंडिया. जो परदेशांत स्थायीक जाल्ल्या भारतीयांक दोट्टी नागरीकत्व दिता. आतां परदेशांत स्थायीक जाल्ले खालिस्तानी समर्थक भारतांत परत येवंक शकचे नात ह्या भंयान ते उक्तेपणी निदर्शनां करप टाळपाक लागल्यात.
पन्नूची मालमत्ता जप्त
खालिस्तानी आतंकवादी पन्नूचेर एनआयए भारतांत कारवाय केल्या. चंडीगढ आनी अमृतसरांत ताची जप्त केल्ली मालमत्ता, आतां सरकारी मालकेची जाल्या. पन्नू कॅनडा आनी हेर देशांनी भारत विरोधी उलयता. हालींच कॅनडा- भारत वादांत ताणें कॅनडांत रावपी हिंदू लोकांकय धमकायल्ले. आपल्या विचारां कडेन सहमत नात, ते मनीस ताका आवडनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
