कॅगाची बडी, तरीय साळावली कडेन सरकाराची आडनदर

भांगरभूंय | प्रतिनिधी

उदका पुरवण खात्या कडेन शेती खातीर उदक वापरपी शेतकारांची म्हायतीच ना

भांगरभूंय । प्रतिनिधी

पणजी : दक्षीण गोंयच्या 14106 हॅक्टर शेत जमनीक उदका पुरवण करपाचो हेत आशिल्ल्या साळावली धरणांतल्यान आयचे घडयेक 5 हजार हॅक्टर शेत जमनीक उदका पुरवण जाता. हें प्रमाण 36 टक्के आसा. दोन वर्सां पयलीं साळावलीच्या कारभाराचेर म्हालेखापालानी (कॅग) बडी मारले उपरांत लेगीत सरकारा कडल्यान साळावली कडेन जावपी आडनदर चालूच आसा. हातूंत आतां उदका पुरवण करपाचो हेत आशिल्ली जमीन (कमांड एरिया) 14106 हॅक्टरा वयल्यान 9686 हॅक्टराचेर आयल्या. ह्या उण्या उद्दिश्टां सावन लेगीत उदका पुरवण खातें खुबूच फाटीं आसा.

साळावली धरणाक 1971 वर्सा सर्गेस्त भाऊसायब बांदोडकार हांच्या सरकारान मान्यताय दिल्ली. शेती खातीर दिसाक 528 एमएलडी जाल्यार पियेवपा सयत उद्देगीक वापरा खातीर 380 एमएलडी उदका पुरवण करपाचो हेत दवरून प्रकल्पाची उबारणी जाली. शेती खातीर उदका पुरवण करपा खातीर कानाल तयार केले. पियेवपा सयत उद्देगीक वापरा खातीरचे उद्दिश्ट पुराय जालां. शेती खातीरचें उद्दिश्ट मात पुराय जावंक ना.

कॅग अहवालाचेर कारवाय ना

साळावली धरणा सावन शेती खातीर उदका पुरवण करपाचे जो हेत आशिल्लो तो 50 टक्के लेगीत पुराय जावंक ना, अशी टिका करीत म्हालेखापालानी (कॅग) साळावली धरणा विशीं सरकाराचेर बडी मारिल्ली. हाका आतां दोन वर्सां पुराय जाल्यांत. उद्दिश्टाच्या 14106 हॅक्टरांतली 4796 हॅक्टर शेत जमनीक उदका पुरवण जाता, असो उल्लेख म्हालेखापाल अहवालात आशिल्लो. साळावली धरणाच्या अभियंत्यां कडल्यान मेळिल्ले म्हायती प्रमाण लागीं लागीं 5 हजार हॅक्टर शेत जमनीक उदका पुरवण जाता. कुंकळ्ळी, काकोडें, केपें ह्या वाठारांतले मोडिल्ले कानाल आसा तशेंच आसात. कानालांचे दुरुस्ती खातीर निविदा जारी जाल्या, अशी म्हायती अभियंत्यांनी दिली. दुरुस्तीचो वावर काय अजून मेरेन सुरू जावंक ना. निविदा जारी जावन काम सुरू जावपाक कळाव कित्याक जाता, हाची जाप खात्या कडेन ना.

शेतकी खात्या कडल्यान म्हायती मेळना

साळावली धरणांतल्यान उदका पुरवण करपा खातीर केपें, सांगें आनी साश्ट ह्या म्हालांत कानाल आसात. ह्या कानालांतल्यान कितल्या शेतकारांक उदका पुरवण जाता. हाची म्हायती शेतकी खात्या कडेन ना. शेतकी खात्या कडल्यान ही म्हायती उदका पुरवण खात्या कडेन येवपाक जाय. शेती करपा खातीर शेतकारांक उर्बा दिवपाची जापसालदारकी शेती खात्याची आसा. शेतकार शेती करपा खातीर फुडें येनात. हाका लागून बरेच कडेन उदक फुकट वता. उदकाची नाशाडी जाता, अशी म्हायती अभियंत्यांनी दिली.

फाटल्या 10 वर्सां कानालांचे दुरुस्तीचेर 30 ते 40 कोटी रुपया खर्च जाल्यात. कानालांची देखभाल सारकी जायना अशें म्हालेखापालांनी स्पश्ट केल्लें. कुंकळ्ळी, काकोडें आनी केपें वाठारांत मोडिल्ले कानाल आसा तशेंच आसात. दुरुस्ती कडेन आडनदर जाल्या. हाका लागून उदक फुकट वता, अशी म्हायती गोपांनी दिली.

ऊसाच्या लागवडींतूय वाड ना

साळावली धरणांतल्यान 2350 हॅक्टर जमनींत ऊसाची लागवड करपाचें उद्दिश्ट आशिल्लें. संजिवनी साकर कारखान्याक जो ऊस लागता, तो तयार करपाचोय हेत आसलो. प्रत्यक्षांत फक्त 80 हॅक्टर जमनीचेर ऊसाची लागवड जाता. संजिवनी साकर कारखानो बंद आसा. हाका लागून ऊसाची लागवड करपा कडेन शेतकारांचो कल ना. हें लेगीत ऊस लागवडीची जमीन न वाडपा फाटलें एक कारण आसा.

शेतकार संघटणां कडेन चर्चेचो उणाव

दक्षीण गोंयांत शेतकारांच्यो संघटणा आसात. ह्या शेतकारां कडेन बसका घेवन उदका विशीं चर्चा जावपाक जाय. उदक पावता काय, कितल्या उदकाची गरज आसा, हाची चर्चा करून ते प्रमाण कानालांचीं कामां जावपाक जाय. ज्या जाग्यार शेती करिनात, थंय कानालाचें उदक पावता. जे कडेन शेतकार रोयतात, थंय उदक पावना. शेतकार संघटणां कडेन खात्याची चर्चा नाशिल्ल्या कारणान खंय उदक जाय आनी खंय नाका, ताची कल्पना खात्याक येना. शेतकार संघटणांच्यो बसका घेवपा खातीर शेतकी खात्यान फुडाकार घेवपाची गरज आसा, अशें एका अभियंत्यान सांगलें.

• साळावली धरणाच्या उदकाचो लाव 4 हजार शेतकार घेतात, अशी नोंद आसा. हो आंकडो पोरणो आसा. नवो आंकडो खात्या कडेन ना.

• शेतीच्या वाठाराची गरज विचारांत घेवन ते प्रमाण उदक सोडिनात. हाका लागून उदकाची नाशाडी सुरूच आसा.

• उदक पावपा खातीर 1172 हॅक्टर जमनींत कानाल आनी टाकयांची वेवस्था आसा.

साळावली धरणा वयलो खर्च : 187.37 कोटी

धरणाची उंचाय : 42.7 मिटर

उदकाच्या सांठ्याचो वाठार : 24 चौखण किमि

सध्या 338 एमएलडी उदकाचो पियेवपा सयत उद्देगा खातीर वापर

शेती लागवडीचे मूळ उद्दिश्ट : 14326 हॅक्टर जमनीक उदका पुरवण

आतांचे उद्दिश्ट : 9686 हॅक्टर जमनीक उदका पुरवण

आतां मेरेन सुमार 5 हजार हॅक्टर जमनीक उदका पुरवण