भांगरभूंय | प्रतिनिधी
कृष्णायण
(झुजाचो दीस थारतकच आपणाक कळय, निरोप मेळटकच आपूण सैन्य घेवन उपप्लाव्य नगरांत येतां, अशें कृ्ष्णान भायर सरचे पयलीं पांडवांक सांगलें…. आतां मुखार….)
द्वारकेंत पावतकच कृष्ण बलरामाक मेळ्ळो आनी ताणें ताका पांडवांनी कौरवा आड झूज करपाचें थारायलां अशें सांगलें. पांडवांचो निरोप येतकच आपूण नारायणी सैन्याचो पंगड घेवन पांडवांक झुजांत मजत करपाक वतलो अशें कृष्णान ताका म्हणलें. कृष्णान तशें म्हणिना फुडें बलरामाक राग आयलो आनी ताणें कृष्णाक विचारलें, ‘झुजाचो निर्णय युधिश्ठीरान घेतला काय तुंवें पांडवांक झुजा खातीर तयार केल्यात रे? भाव- भाव झगडटात जाल्यार झगडूं दी! तूं कित्याक मदीं पडटा? तांचो प्रस्न तांकां सोडोवं दी! अर्जुना सारको धोणूर्विर आनी भीमा सारको गदावीर पांडवां कडेन आसा. झगडूं दी तांकां कौरवा आड! तुजी कितें गरज आसा? तू ओग्गी रावशीत जाल्यार ते झूज करपाक फुडेंच सरचे नात, हें म्हजे भशेन तुकाय खबर आसा. आनी आमचे सैन्य कित्याक रे? कौरवांनी आमचे कितें वायट केलां? म्हाका दिसता तुवें ह्या झुजांत भाग घेवचो न्ही आनी नारायणी सेनेचो पंगड तर व्हरचोच न्ही!’
कृष्णान मागीर बलरामाक म्हणलें, ‘आरे पूण दादा, पांडवांचे वटेन झुजपी सैन्य खूब उणें आसा. चडशे राजा दुर्योधनाचे वटेन आसात. पांडवांचे बळ वाडयना जाल्यार ते झूज हारतले. दुर्योधन जिखतलो. अन्यायाक जैत मेळटलें. पापी मनशांक आनीक नेट मेळटलो. म्हणून आमी पांडवांचे वटेन झुजांत वाटो घेवपाक जाय अशें म्हाका दिसता.’ कृष्णान अशें म्हणटकच बलरामान ताका विचारलें, ‘पापी मनशांक सोंपोवपाचो तुवेंन ठेको घेतला काय कितें रे? फाटीं नरकासूराक मारिल्लो तेन्नाय तुवें अशेंच म्हणिल्लें. ह्या वेळार परिस्थिती मात्सी वेगळी आसा हें तुज्या लक्षांत कशें येना? पांडव आमचे आतेभाव. कौरव तांचे चुलतभाव. सगलेच आमचे सोयरे. एकाक तेंको दिल्यार दुसऱ्याचेर अन्याय जावचो ना? तूं पांडवांचेर अन्याय जाला, अन्याय जाला, अशें म्हणटा. पूण त्या पांडवांचो आजो भीष्म ओगी, हात कंवळून बसला. ताच्या कुळांतलो सगल्यांत जाण्टो मनीस म्हणून ताणें हो प्रस्न सोडोवपाक जाय आशिल्लो. ताणें दोळे धांपून घेतल्यात. मागीर तूं कित्याक वयर सकयल जाता? आतां म्हाका एक सांग. हस्तिनापूर राज्य विचित्रविर्याचें आशिल्लें मरे? ताचो व्हडलो पूत कोण? धृतराष्ट्र! म्हणटकच विचित्रविर्या उपरांत हस्तिनापूराचो राजा धृतराष्ट्र आनी धृतराष्ट्राचो व्हडलो पूत दुर्योधन. अशें जर आसा जाल्यार हस्तिनापूराचेर पयलो हक्क दुर्योधनाचो आसा अशें म्हाका दिसता. भीष्माकूय एकाद्रे अशेंच दिसता आसतलें. तेन्ना पांडवांचेर अन्याय जाला हें जें कितें तूं म्हणटा तें विसर.’
‘हांव परत एकदा तुका सांगता पांडव – कौरवांच्या झुजा मदीं तूं वांटो घेवपाचो ना. तुजो नारायणी सेनेचो पंगड तूं धाडपाचो ना. हांवूय म्हजो पंगड धाडचो ना. सात्यकी आनी कृतवर्मा हाका जाय तें करूं दी. नारायणी सेनेचे आपले पंगड घेवन ते झुजांत वांटो घेतात जाल्यार घेवंदी. हें सगळें जें कितें चल्ला तें पळोवन म्हाका ह्या सगल्याचो वीट आयला. तेन्ना म्हजें मन शांत करपाक हांव तिर्थयात्रा करपाक वता. तुमी करात झूज!’ बलरामान सगळे उलोवन आपलें मन मेकळें केलें.
आरे दादा, हांवेंन पांडवांक तांकां झुजांत मजत करतां अशें उतर दिलां मरे! हांवें म्हजें उतर मोडचें अशें दिसता तुका? सांग मरे, कृष्णान बलरामाक प्रस्न घालो. तूं वता जाल्यार वच पांडवां कडेन. पूण झुजा वेळार तू हातांत कसलेंच शस्त्र घेवचो ना. ही म्हजी तुका आज्ञा आसा अशेंच समज, कळ्ळे? बलरामान कृष्णाक जाप दिली आनी तो थंय सावन गेलो. कृष्णान मागीर सात्यकी आनी कृतवर्माक आपोवन घेतले आनी बलराम कितें उलयला तें तांकां सांगलें. झुजा वेळार कोणाक तेंको दिवचो हें तांचे तांणीच थारावचें अशें बलरामान तांकां सांगलां. तेन्ना तांचो विचार कितें आसा असो प्रस्न कृष्णान तांकां केलो. तशें सात्यकीन, तो आनी ताचे पूत तांच्या नारायणी सेनेचे पंगड घेवन पांडवांक तेंको दितले अशें सांगलें. आपूण दुर्योधना वटेन झुजांत वांटो घेतलो अशें कृतवर्मान म्हणलें. कृतवर्मान म्हणिल्लें आयकून कृष्णाक अजाप जावंक ना. बलराम आनी कृतवर्माचो कल पयली सावन दुर्योधना वटेन आसा हें तो जाणा आशिल्लो. अशें तरेन सगले थारले उपरांत कृष्ण आतां उपलाव्य नगरातल्यान केन्ना निरोप येता काय ताची वाट पळयत रावलो.
मुखार चलता
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
