भांगरभूंय | प्रतिनिधी
पणजीः शेतकी मंत्री रवी नायक हांचे अध्यक्षते खाला सरकारान स्थापन केल्ले समितीन कृशी धोरणाचो मसुदो तयार करून तो मुख्यमंत्री डॉ. प्रमोद सावंत हांचे कडेन धाडला. फुडल्या म्हयन्यांत जावपी राज्य मंत्रीमंडळ बसकेंत मसुद्याक मंजुरी मेळटली आनी तो लोकांच्यो सुचोवण्यो तशेंच हरकतीं खातीर दवरपाची शक्यताय आसा, अशी म्हायती शेतकी खात्यांतल्या गोपांनी शेनवारा ‘भांगरभूंय’ कडेन उलयतना दिली.
गोंयचें कृशी धोरण तयार करपाची येवजण फाटल्या कितल्याश्याच वर्सांच्यान चलताली, पूण धोरण प्रत्यक्षांत येवंक नाशिल्ली. मुख्यमंत्री डॉ. प्रमोद सावंत हांणी मुख्यमंत्रीपदाच्या पयल्या कार्यकाळांतूच कृशी धोरण तयार करपाचे संकेत दिल्ले. ते प्रमाण दुसऱ्या कार्यकाळांत धोरण तयार करपाची प्रक्रिया लेगीत सुरू केली. हे विशीं शेतकी मंत्री रवी नायक हांच्या फुडारपणा खाला शेती मळा वयले तज्ञ आनी शेतकारांचो आस्पाव आशिल्ली समिती स्थापन केल्ली. हे समितीन शेतकारांच्यो सुचोवण्यो विचारांत घेवन धोरणाचो मसुदो तयार करून तो मुख्यमंत्री डॉ. सावंत हांकां सादर केला. मुख्यमंत्री मसुद्याचेर विचार करतात. फुडल्या म्हयन्यांत जावपी गोंय मंत्रीमंडळ बसकेंत मसुद्याक मंजुरी दिवपाचें आनी तो सुचोवण्यो तशेंच हरकतीं खातीर उक्तो करपाचो विचार लेगीत ते करतात, अशें गोपांनी म्हणलां. मजगतीं, कृशी धोरणा संबंदांत स्थापन केल्ले समितीन मसुदो तयार करतना शेतकारांक ऑनलायन पद्दतीन सुचोवण्यो करपाक सांगिल्ले. ताचे वयल्यान विरोधी पक्षां सयत कांय शेतकारांनी सरकाराचेर टिका केल्ली. ते उपरांत कृशी खात्याच्या अधिकाऱ्यांनी कांय वाठारांनी वचून शेतकारांच्यो सुचोवण्यो समजून घेतिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
