भांगरभूंय | प्रतिनिधी
राजन घाटेः मडकय शेतकार संमेलनांत उक्तायली गरज
भांगरभूंय । प्रतिनिधी
फोंडें: गोंयांतल्या खूबश्या लोकांचे कूळ मुंडकाराचे प्रस्न न्यायालयांत खूब वर्सां सावन पडून आसात. प्रस्न मार्गाक लावचे खातीर वेंचून दिल्ले लोक प्रतिनिधींनी विधानसभेंत खास कायदो चालीक लावपाची गरज आसा, अशें आरटीआय कार्यकर्ते राजन घाटे हांणी सांगलें.
मडकय वाठारांत फोंडें म्हाल कूळ- मुंडकार जनजागृती मंचान आयोजीत केल्ल्या शेतकार संमेलनाच्या उक्तावण सुवाळ्यांत राजन घाटे उलयताले. ह्या वेळार आदले सरपंच भोलू नायक, सरपंच शैलेंद्र पणजीकार, पंच विनोद नायक, विद्या गावडे, अॅड. सदानंद वायंगणकार, पुंडलीक धारगळकार, राजेश नायक, दत्ता नायक, प्रेमानंद गावडे आनी हेर मानेस्त हाजीर आशिल्ले.
कूळ- मुंडकारांच्या प्रस्नाचेर लोकांक तारीख पे तारीख मेळत आशिल्ल्यान खूबशीं वर्सां न्यायालयांत वच्चें पडटा. सरकारान घोशणा करचे बदला ह्या प्रस्नाचेर उपाय काडचे खातीर सर्वेक्षण करून न्याय दिवपाची गरज आसा, अशें घाटे हांणी सांगलें.
अॅड. वायंगणकार हांणी सांगलें, कूळ- मुंडकारांच्या न्याया खातीर लोकांक न्यायालयांत वच्चें पडटा. ते प्रमाण भाटकारांक आपूण स्वता भाटकार आशिल्याचें सिद्ध करून दाखोवपाची गरज आसा. हे संबंदांत गोंयभरांत जागृताय करून योग्य निर्णय घेतले, अशें तांणी सांगलें.
भोलू नायक हांणी सांगलें, सुमार 40 वर्सां कूळ- मुंडकाराचे प्रस्न न्यायालयांत पडून आसात. सरकारान हे संबंदांत योग्य निर्णय घेवन लोकांक न्याय दिवपाचो यत्न करपाक जाय.
मडकय वाठारांत व्हड संख्येन कूळ- मुंडकारांचे प्रस्न अजून लेगीत उरल्यात. त्या उरिल्ल्या प्रस्नांचेर तत्काळ उपाय काडचे खातीर सरकारान यत्न करपाक जाय. हे संबंदांत थळावें पंचायत मंडळ सदांच लोकांक मजत करतलें, अशें सरपंच शैलेंद्र पणजीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
