भांगरभूंय | प्रतिनिधी
निरोगी उरपा खातीर कुडीक योग्य प्रमाणांत प्रोटिन्स गरज आसता. खूब व्यायाम करपी आनी कश्ट करपी लोकांक भरपूर प्रोटीन आशिल्लें जेवण जेवपाचो सल्लो आहारतज्ञांनी दिला. हाका लागून स्नायू, हाडां आनी केंस घट जातात. इतलेंच न्हय तर वजन उणें करपाक आनी कांतूय तिकतिकीत उरता. एंझायम आनी हार्मोन हाचे खातीर प्रोटिनांची गरज आसता. दोतोरांच्या मतान बरे भलायके खातीर आमकां खूब प्रोटिन्स जाय पडटा. कारण – प्रोटिनां बगर कुडींत गरजेचे सगळे ऍमिनो ऍसीड तयार करपाक मेळनात.
तुमचे कुडीक जाय आशिल्ल्या प्रोटिन्साचें प्रमाण वजन, पिराय, क्रियाशीलतेची पातळी आनी भलायकेची गरज ह्या घटकांचेर आदारून आसता. भुरगीं, व्हडले आनी जाण्टे हांकां तांचे पिराये प्रमाण आनी शारिरीक क्षमतेक आदारून प्रोटिनांची गरज वेगवेगळी आसूं येता. सादारण मार्गदर्शक तत्वां म्हूण दरेकल्याक दर किलो कुडीच्या वजनाक ०.८ ते १.२ ग्राम प्रोटिनाची गरज आसता.
प्रोटीन्स आशिल्लें जेवण खावप पुरायपणान बंद केल्यार कुडींत खंयचे बदल घडटात तें पळोवया:
१. स्नायुंचें लुकसाण: सात दीस प्रोटिन्स आशिल्लें कांयच खावंक ना जाल्यार स्नायूंचे भलायकेचेर वायट परिणाम जावंक शकतात अशें अभ्यासांतल्यान दिसून आयलां. हो परिणाम जाण्ट्यांमदीं चड दिसता.
२. पचन प्रक्रिया मंद करप: पचनाची प्रक्रिया स्थीर दवरपा खातीर घट स्नायू म्हत्वाचे आसतात. प्रोटिन्स फावो त्या प्रमाणांत घेतल्यार स्नायू दुबळे जातात आनी ताका लागून पचन मंद जाता आनी वजन वाडूंक शकता.
३. रोगप्रतिकार शक्तीचेर परिणाम: दुबळी रोगप्रतिकार शक्तीक लागून चड करून दुयेंत पडपाचो धोको वाडटा.
४. जेवणाची इत्सा वाडप: प्रोटिन्स फावो त्या प्रमाणांत घेतल्यार तुमची जेवण जेवपाची इत्सा वाडटा. कारण- तुमकां तातूंत जाय आशिल्ले सगळे पोशक तत्व मेळनात. स्वाभावीकपणान हाका लागून जेवल्या उपरांत लेगीत पोट भरिल्लेवरीं दिसना.
५. कांत आनी केंसांचें लुकसान: प्रोटिन्स हो कात आनी केंस हांच्या रचणुकेचो एक भाग. फावो तें प्रोटिन्स मेळनाशिल्ल्याान कात मंद जावंक शकतात आनी केंस लेगीत गळूंक शकतात.
६. हाडांच्या बळग्याचेर परिणाम: प्रोटिन्साच्या उणावाक लागून हाडां दुबळीं जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
