भांगरभूंय | प्रतिनिधी
खेळगड्यांनी रस्त्याचेर देवन आंदोलन करप, हें बेशिस्त वागणुकेचें लक्षण. ताका लागून आमच्या भारताची प्रतिमा इबाडल्या, तिका खत लागलां, अशें मत भारतीय आॅलिंपीक संघटनेची अध्यक्ष पी. टी. उषा हांणी उक्तायता थंय आसा, ताचेर सगल्यांनी टिका सुरू केली. भालो मोखपी खेळगडो नीरज चोप्रा, कपिल देव, सानिया मिर्झा तातूंत आसात. तर ममता बॅनर्जी, अरविंद केजरीवाल, स्वरा भास्कर आनी हेर जायत्या राजकी, समाजीक फुडारी, ट्विटरपटूंनी उपोशण करपी पेलवानांक जाहीर तेंको दिला. भारतीय कुस्ती महासंघाचे अध्यक्ष आनी भाजपा खासदार बृजभूषण (ब्रीजभूषण) शरण सिंह हांचेर कांय बायलां खेळगड्यांनी लिंगीक छळाचो आरोप लायला. जानेवारींत तीं उपास करतालीं. खेळा मंत्री अनुराग ठाकूर हांणी कारवाय करपाचें उतर दितकच सगल्यांनी उपास आंदोलन फाटीं घेतिल्लें. पूण, तीन म्हयने जाले तरी कोणेच पावल उखलूंक नाशिल्ल्यान आतां परत साक्षी मलिक, विनेश फोगाट, बजरंग पुनिया, संगीता फोगाट उपासाक बसल्यांत. तांणी सर्वोच्च न्यायालयांतूय याचिका दाखल केल्ली. ताचेर काल निकाल आयला. सरन्यायाधीश डी. व्हाय. चंद्रचूड हांणी बृजभूषण हांचेर पुलीस कागाळ दाखल करात आनी 18 वर्सां सकयल्या सगल्या बायल पेलवानांक सुरक्षा दियात, अशें म्हणलां. हे केशीचेर 5 मे दिसा फुडली सुनावणी जातली. ह्या पुराय प्रकरणाचेर पुलीस कितें करतात, ताचो नियाळ हांव घेतलों, अशेंय तांणी म्हणलां.
न्यायालयूय नेण्ट्या पेलवानांक राखण दियात, अशें म्हणटा, जाल्यार ह्या प्रकरणांत दुबाव घे सारक्यो गजाली आसतल्यो. स्वता बृजभूषण सिंह हांणी आपूण कसो निश्पाप हें सांगपी व्हिडियो सोशल मिडियाचेर घाला. आॅलिंपिकांत भांगरा पदक मेळोवपी बायल पेलवान उपासाक बसल्यात, हें आमी विसरूंक फावना. तालुको वा जिल्हो पांवड्याचेर खेळपी ह्यो खेळगड्यो न्हय. तेन्ना खेळां मंत्रालयान हें प्रकरण गंभीरपणान घेवपाक जाय आशिल्लें. ओग्गी रावल्यार भारतीय परंपरे प्रमाण, कांय दिसांनी आंदोलन शांत जातलें अशें तांकां दिसलें आसतलें. पूण हीं बायलां हरयाणाची, तातूंत पेलवान. थंयच्या शेतकारांनी चिवटपणान जशें वर्सभर आंदोलन चलयलें, तेच तरेन ह्यो बायलो दिल्लींतल्या कडकडीत वतांत उपासाक बसल्यात. बृजभूषणाक अटक जाले बगर फाटीं सरचीं नात, अशें म्हणटात. न्यायालयान बडी मारल्या, पूण भारतीय आॅलिंपीक असोसिएशनान ह्या प्रकरणाचेर अजून तपास पूर्ण करूंक ना. सरकारान खास समिती नेमिल्ली. मात तिणें कितें निश्कर्श काडला, तें जाहीर जावंक ना. काल देशाची भोवमानादीक धांवपटू आनी केन्नाच वादग्रस्त उलोवंक नाशिल्ली खेळगडी पी. टी. उषा हांणी पेलवानांनी जाहीर आंदोलन केल्ल्यान देशाची प्रतिमा इबाडल्या, अशें विधान केलें. हाचो अर्थ अन्याया आड कोणेय आवाज काडल्यार तो देशाचें नांव घाण करपी, थोडक्यांत देशद्रोही थारलो. लिंगीक छळ केल्यार भारताच्या नांवाक खत लागना, पूण तें भोगचें पडिल्ल्यांच्या फावोरान आंदोलन करतात ते मात देशाक बदनाम करतात? हो ‘कमेंट विथ डिफरन्स’ जालो ना? सुर्य उदेंवचे पयलीं मळबांत हळडुवो, तांबसो, धवसो उजवाड फांकता, ताका उषा म्हणटात. उपरांत सूर्य काळखे निशेक धांवडावन उजवाड पातळायता. मात पी टी उषा हांच्या वक्तव्यान अन्याया आड झगडपी पेलवानांच्या मनांत प्रकाशा बदला काळोख दाटलो आसतलो. भांगरा पदक हाडून देशाचें नांव गाजोवपी पेलवानांक तेंको दिवपा बदला तांणी देशाचें नांव घाणायलें, अशें वक्तव्य कित्याक केलें तें कळना. आॅलिंपीक समितीची अध्यक्ष केल्या म्हूण?
भारतीय कुस्ती महासंघाच्या 2- 3 प्रशिक्षकांचेर पेलवानांनी फाटले जानेवारींत आरोप केल्ले. 30 पेलवान उपासाक बशिल्ले. विशेश म्हणल्यार फोगाट भयणींतली बबिता ही भाजपाची फुडारी. जांचेर आरोप जाला, ते बृजभूषण सिंह हे 2011 सावन महासंघाचे अध्यक्ष आसात. स फावटी भाजपाचे तिकेटीचेर वेंचून आयल्यात. तांचे पूतय आमदार आसात. विनेश फोगाट सोडल्यार हेर कोणूच आपणाचेर आरोप करीना, अशें बृजभूषण हांचें म्हणणें. तें कितेंय आसलें तरी तांणी पद सोडून चवकशेक सामकार वचपाक जाय आशिल्लें. सदांच अन्याय पयस जावपाक जाय आनी सत्य जिखपाक जाय, हें सगल्यांनी घट मतींत दवरल्यार बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
