भांगरभूंय | प्रतिनिधी
खबरां संस्था
नवी दिल्लीः भारतीय कुस्ती म्हासंघाचो अध्यक्ष ब्रीजभूषण शरण सिंह हाचे अटके खातीर दिल्लींत जंतर मंतराक कुस्तीगीरांनी सुरू केल्ल्या धरणे आंदोलनाक आतां 9 दीस जाल्यात. हे मजगतीं कांय कुस्तीगीरांक लागून फाटल्या चार म्हयन्यां सावन सगल्यो सर्ती बंद पडल्यात अशें भाजपाचो खासदार शरण सिंगान सांगलां.
म्हाका जाय जाल्यार फांशी दियात मात खेळ थांबयनाकात अशें आवाहन तांणी धरणें धरिल्ल्यांक केलां. कुस्ती खेळाची आवड आशिल्ल्या भुरग्यांच्या फुडाराकडेन खेळनाकात. खंयच्या राज्यांत राष्ट्रीय कॅम्प सुरू करपाक सोदता जाल्यार ताका आडायनाकात. ज्या भुरग्याची पिराय 14 वर्सा 9 म्हयने आसा ताची 3 म्हयन्यां उपरांत आपले जीणेंतली पयली सर्त खेळपाची संद वतली हाचो विचार करात अशें सांगतना प्रधानमंत्री नरेंद्र मोदी हांणी सांगल्यार आपूण राजिनामो दिवपाक तयार आसा अशें ताणे स्पश्ट केलें.
सोमराक पंजाब काँग्रेसाचो ज्येश्ठ फुडारी आनी आदलो क्रिकेटीयर नवज्योत सिंग सिद्धून कुस्तीगीरांच्या समर्थनाक धरणे सुवातेर आयलो. संयुक्त किसान मोर्चान लेगीत कुस्तीगीरांक आपलें समर्थन दिला. मंगळाराक मार्चोचो अध्यक्ष राकेश टिकैत धरणे सुवातेर येवंन कुस्तीगीरां कडेन उलोवणी करतलो.
हरियाणाचो वीज आनी बंदखण मंत्री रणजीत चौटालान कुस्तीगीरांच्या धरणे आंदोलनाक तेंको दिला. ब्रीजभूषणाच्या राजिनाम्याची मागणी ताणे केल्या. आबायल कुस्तीगीरांची लिंगीक अत्याचारा खातीर पॉक्सो खाला एफआयआर नोंद केल्ल्या गुन्यांवांक जामीन मेळना. जाल्यार शरण सिंह हांका अजून अटक कित्याक केली ना. ताकद आशिल्ल्याक वेगळो कायदो आसा काय कितें अशें सिद्धून विचारलां. कोणाच्यान कोणालें करिअर घडोवपाक आनी इबाडपाक शकता काय किदें. सगल्या प्रकरणाची निपक्षपाती प्रमाण चवकशी करून दोशी आशिल्ल्याचेर कारवाय करपाची मागणी ताणे केल्या.
ही लडाय बायलांच्या सन्माना खातीर आसा. जो समाज बायलांक मान दिता तो फाटीं पडत वता अशें ताणे सांगलें. ब्रीजभूषण शरण सिंगान आपले आड कट चल्ला असो आरोप केला. हो कट रचपा खातीर सुमार 100 कोटी रुपया खर्च केल्यात आनी तातूंत दीपेंद्र हुड्डा हाच्या वांगडा एका उद्देजकाचो हात आसा असो दावो ताणे केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
