भांगरभूंय | प्रतिनिधी
पणजी : सरकारान तयार केल्ल्या नव्या कुशावती जिल्ह्याक लागून ह्या भागांत नव्यो मुळाव्यो सुविधा निर्माण जातल्यो. हाका लागून थळाव्यांक नवीन संद उपलब्ध जातली. राज्याची लोकसंख्या आनी पर्यटक संख्या लक्षांत घेवन प्रशासनाचें विकेंद्रीकरण करप गरजेचें आशिल्लें अशें भाजप प्रदेशाध्यक्ष दामू नायक म्हणलें. शुक्रारा पणजे जाल्ले पत्रकार परिशदेंत ते उलयताले. ह्या वेळार समाज कल्याण मंत्री सुभाष फळदेसाय, आमदार नीलेश काब्राल, विनय तेंडुलकार आनी हेर हाजीर आशिल्ले.
दामू नायक हांणी सांगलें, नव्या जिल्ह्या खातीर नवी प्रशासकीय इमारती, हॉस्पिटलां, शिक्षणीक संस्था, रस्ते तयार करतले. सगल्यो मुळाव्यो सुविधा निर्माण करपाक पांच वर्सां लागपाक शकता. मात हाचो फायदो हांगच्या थळाव्यांक जातलो. हांगा एसटी समाजाची लोकसंख्या चड आसा. कुशावती जिल्ह्याक लागून ह्या समाजा खातीर केंद्राच्या तशेंच राज्याच्या विवीध समाजीक कल्याणाच्यो येवजण्यो राबोवप अदीक सोपें जातलें. हाका लागून ह्या भागाची आनीक उदरगत जातली.
तांणी मुखार सांगलें, राज्याची लोकसंख्या वाडटा. हांगा वर्सभर सुमार एक कोटी पर्यटक भेट देतात. अशा वेळार विकेंद्रीकरण केल्ल्यान थळाव्यांक फायदो जातलो. गोंयांत दरेक नवे गजालीक विरोध करपी कांय मनीस आसात. अशा लोकांनी कोकण रेल्वे, मोपा विमानतळाक विरोध केल्लो. मात आतां तेच लोक हाचो फायदो घेवपाक मुखार आसात. नव्या जिल्ह्या विशीं कांय आक्षेप आसल्यार ते सरकाराक कळोवचें. मात फकत विरोधाक विरोध करप योग्य न्हय.
कुशावती नांव योग्य
मंत्री फळदेसाय हांणी, कुशावती जिल्ह्याक लागून केपें, सांगें, काणकोण आनी धारबांदोडेंच्या लोकांक शिक्षण, नोकरी वा हेर सरकारी कामां खातीर मडगांवां वयचें पडचें ना. कुशावती न्हंये देगेर प्राचीन काळा पसून संस्कृती तयार जाल्ली. हाका लागून नव्या जिल्ह्याक कुशावती हें नांव योग्यूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
