भांगरभूंय | प्रतिनिधी
मडगांव: कुशावती जिल्ह्यांतल्या बाळ्ळी-अडणे पंचायत आनी लोलयां-पोळयें पंचायतींतल्या प्रभाग नंबर आठांत पोटवेंचणूक जातली. हे फाटभूंयेर, कुशावतीचे जिल्लोधिकारी एग्ना क्लिटंस हांणी प्रतिबंधात्मक आदेश जारी केल्यात. मतदानाच्या ४८ वरां पयलीं प्रचारा सयत ध्वनिक्षेपक वापराचेर बंदी घातिल्ल्यान कसलोच वायट प्रकार टाळपा खातीर प्रशासनान खर पावलां उखल्ल्यांत.
कुशावती जिल्ह्यांतलीं बाळ्ळी- अडणे आनी लोलयां- पोळये पंचायतींच्या प्रभागांत जावपी पोटवेंचणुके खातीर ६ मार्चाक सांजे वेळार स वरां सावन ८ मार्चाक सांजे वेळार स वरां मेरेन जमावबंदी लागू आसतली. ह्या काळांत बेकायदेशीर जमाव करप, मिरवणुको, रॅली काडप वा जाहीर बसकेचेर पुरायेन बंदी आसा. तशेंच, मतदानाच्या ४८ वरां पयलीं सावन लावडस्पीकर वापरपाक मनाय केल्या.
मतदान शांततेंत जावचे खातीर ७ ते ९ मार्च २०२६ ह्या काळांत संबंदीत प्रभागांत सोर्याचे विक्रेचेर बंदी आसतली. वेंचणूक मळावेलीं सगलीं सोर्याचीं दुकानां, हॉटेल्स, रेस्टॉरंट्स आनी क्लबांनी सोरो विकप आनी सोरो बाळगुपाक मनाय केल्या. तशेंच मतदारांक मतदानाचो हक्क मेळचे खातीर ८ मार्चाक संबंदीत क्षेत्रांतल्या सगल्या सरकारी आनी खासगी आस्थापनांतल्या कर्मचार्यां खातीर ’पेड हॉलिडे’ (भरपगारी सुटी) जाहीर केल्या. वेंचणूक काळांत कायदो आनी सुवेवस्था राखपा खातीर हे आदेश लागू केल्यात. हे नेम मोडप्यांचेर ’भारतीय नागरिक सुरक्षा संहिता’ खाला खर कारवाय करतले, अशी शिटकावणी जिल्लोधिकारी एग्ना क्लिटंस हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
