भांगरभूंय | प्रतिनिधी
धावेची परिक्षा दिल्ल्या भुरग्यांनी ‘सोंपली एकदाची बाबा, आमी आतां पुराय मेकळे, करया मौज- मस्ती सुमरा भायली.’ असो सुस्कार सोडला आसतलो. दुबाव ना. एका वेळार परिक्षा दिवपी विद्यार्थी, तांचे शिक्षक, पालक, इश्ट- मित्र, सोयरीं- धांयरी, शेजारी- पाजारी सगल्यांकच हे परिक्षेची उमळशीक लागिल्ली आसताली. त्या वेळार धावेची परिक्षा म्हणल्यार ‘तकले वयर हुमकळपी तरसाद’ असोसो भ्रम सगल्यांनी करून घेतिल्लो. जस जशी परिक्षा लागीं पावताली भयान पोटांत गुळो येतालो. 40- 50 वर्सां फाटीं धावेची परिक्षा दिवप म्हणल्यार एक व्हड दिव्य थारतालें. ही परिक्षा म्हणल्यार होमखणांत उडी घेवपा सारकीच आशिल्ली म्हणल्यार जाता. कारण हे परिक्षेचेरच भुरग्यांचो शिक्षणीक फुडार थारिल्लो आसतालो. आयज काळ बदल्ला. कुशळटायेचें म्हत्व सगल्यांक कळून चुकलां. धावी बर्या गुणांनी पास जावं वा कमी गुण हासील करूं, जाणें आपले कुशळटायेच्या आदारान नवें पावल उखलपाचो यत्न केलो, ताणें जैत पदरांत घेतलेंच म्हूण समजुपाचें. कुशळटायेन वावुरपी शिकपी भुरग्यांक धावेची परिक्षा बरी गेली कांय वायट हाचो तांच्या फुडाराचेर कांयच परिणाम जाल्लो दिसना. कारण तांची कुशळटाय हीच तांची पुंजी जावन आसता, जाच्या नाड्यार ते आपले बस्तान सुगूर करूंक पावतात. त्या भायर हालींच्या तेंपार ‘परीक्षा पे चर्चा’ ही प्रधानमंत्री नरेंद्र मोदी हांची कार्यावळ भुरग्यां खातीर एक ‘टॉनीक’ जावन आसा, जी आमी न्हयकारूंक शकनात. कारण हे कार्यावळींत तकलेर पेज घेनासतना परिक्षेची तयारी बेसबरी कशी करपाक शकतात, हाचेर भर दिल्ल्या कारणान भुरगीं प्रोत्साहीत जावन शिकपाक लागतात, अशें जाणकारांचेय मत जालां.
आयज आपल्या हातांत कसली कला वा कुशळटाय आसा हाचो विचार करून आपले आवडीचें क्षेत्र भुरग्यांनी वेंचले जाल्यार फायद्याचेंच थारतलें. यत्ता धावेचो निकाल लागले उपरांत जायते फावटी पालक भुरग्याक बरे गूण मेळूंक नाशिल्ल्यान तांचेर रागार जातात. फोग काडटात. अशा वेळार भुरग्यांचो आत्मविस्वास उणो जाता. अशी परिस्थिती सतत जायत रावली जाल्यार भुरग्यांचें संतुलन इबाडटा. पालकांनी भुरग्यांचें मनोबल उंचावपाचो यत्न केल्यार फुडाराक बर्या पैकी यश जोडूंक पावपाची दाट शक्यताय आसता. भुरग्याक आपल्या आवडीचे विशय घेवन मुखा वेले शिक्षण घेवची संद दित जाल्यार ते आवडीन शिकतात आनी यश मेळयताय बी. एका वेळार निर्शेल्लोय, आतां आवडीचे विशय घेवंक मेळिल्ल्यान, ते विशय ताका समजूंक सोंपे जातात. तेचपरी ताच्या मनाक बळगें मेळून तो हळू- हळू सुदारपाक लागता.
शिक्षणीक जाणकारांच्या मतान, भुरगो जेन्ना यत्ता आठवेक पावता तेन्ना ताका आपले आवडीचे विशय घेवन शिकपाची तजवीज शिक्षण क्षेत्रांत जावंक जाय. जायत्या पालकांचें आनी शिक्षकांचें हेंच मत. नवें शिक्षणीक धोरणान तशी तजवीज आसतली असो उल्लेख आशिल्ल्यान शिकपी भुरग्यांक ताचो लाव मेळटलो अशी आस्त आमी बाळगुपाक शकतात. शिक्षणीक मळाचेर तशी तयारी करपाचो वावर सुरू जाला. आयच्या शिक्षणीक धोरणांत वेगवेगळ्या पांवड्यार फावो ते बदल सुचयिल्ले आसात. पूर्व प्राथमिक, प्राथमिक, माध्यमिक, उच्च् माध्यमिक शिक्षण, उच्च् शिक्षण, तंत्र आनी कौशल्य शिक्षणाच्या मळार तशेंच वेवसायीक आनी प्रौढ शिक्षणाचोय आसपाव जाल्लो दिसता. पयली राबयताले तें धोरण 10+ 2+ 3 अशें आशिल्लें ताच्या बदला आतां नवें धोरण अशें आसतलें 5 + 3+ 3+ 4 हाचो अर्थ असो, सुरवातीची पांच वर्सां ही पयली पायरी शिक्षण म्हणचें पडटलें, मागीरची तीन वर्सां म्हणल्यार यत्ता तिसरी ते पांचवी मुळाव्या शिक्षणाचो पांवडो. उपरांतचो म्हणल्यार यत्ता सवी ते आठवी मेरेनचो पांवडो मदलो पांवडो जाल्यार, यत्ता णववी ते बारावी मेरेनचो म्हणल्यार चार वर्सांचो हो माध्यमिक पांवडो थारतलो. दरेका पांवड्यार भुरग्यांक आपली शिक्षणीक कुशळटाय पुराय करची पडटली आनी ही पांवड्या पावंड्यांनी पुराय जातली देखून शिकपी भुरग्यांचेर चेंपण येवचें ना. तेचपरी सुरवातीची तीन वर्सां मेरेन पाठ्यपुस्तक नासतना तीन भाशांनी मुळाक्षरां, आंकडे, रंग आकार आनी संगीत ही उदिश्टां साकार करपाचो यत्न आसतलो. देखून भुरग्यांक ती आत्मसात करपाक मजेशीर जातली असो अंदाज आमी शिक्षक तशेंच पालक करुंक शकतात.
मुळावे शिक्षण आवयभाशेंत जावचें हें तत्व आपणायल्ल्या कारणान शिकपी भुरग्यांक सोपें जातलें. जी चूक हाचे पयलीं जाल्या ती सुदरावपा खातीर सरकारान पावलां मारपाची गरज आसा. मुळावे शिकप कोंकणींत दिवंक लागले जाल्यार ताचो लाव शिकपी भुरग्यांक जातलो, हें सत्य आमी विसरूंक फावना. यत्ता पयली ते पांचवी मेरेन वाचनाचेर आनी मुळावे आंकडे वा गणिताचेर भर दिला अशें दिसता. तशेंच यत्ता सवी पासून गणिताचेर आदारित चित्रकला, योग ते क्रीडा मेरेन सगळे विशय शिकप गरजेचें आसतलें. भुरग्यांक कांय सामान्य विशय सोडून आवडीचे विशय घेवपाची मेकळीक आसतली. तेचपरी वेवसायीक शिक्षण दिवपाची तजवीज आसतली. यत्ता णववेक पावतकच भुरग्यांनी आवड आशिल्ल्या वेवसायीक शिक्षणाचो अभ्यास करपाक येतलो. तांकां मात तिसरी, पांचवी आनी आठवी यत्तेंत निमणी चाचणी परिक्षा दिवचीं पडटली. भाशेचें ज्ञान आनी गणिताचें कौशल्य प्राप्त जालें कांय ना हें तपासप गरजेंचे आसतलें.
यत्ता णववेक सामायीक तीन विशयांचेर भुरग्यांक ऑनलायन परिक्षा दिवच्यो पडटल्यो. आपले तयारी प्रमाण ते ती दिवंक शकतले. सक्ती आसची ना. हो एक बरो प्रयोग जावंक पावतलो. शिक्षणीक लवचिकता आपणावची पडटली तशेंच बारावी पास जाल्या उपरांत तीन वर्सांनी पदवी मेळोवचे बदला चार वर्सांचो अभ्यासक्रम आपणावपाक शकतले. हाचो अर्थ असो भुरग्यांनी सादारण पदवी बरोबर वेवसायीक प्रशिक्षण पदवी लेगीत घेवं येता. शिक्षण क्षेत्रांत वा वेवसायीक क्षेत्रांत वचपाची आवड आशिल्ल्यांक हे पद्धतीचो भरपूर लाव जातलो. ह्यो जाल्यो कागदा वेल्यो खबरो. नवे बदल जेन्ना शिक्षण मळार लागू जातले तेन्ना पळोवया खंय मेरेन पावता ते. तो मेरेन आमी वाट पळोवया, व्हडली सुटी खोशयेन घालोवया.
एच मनोज
9822441417
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
