भांगरभूंय | प्रतिनिधी
कुवेत: गोवन कल्चरल सेंटर (GCC), कुवेत वतीन 31 ऑक्टोबराक ‘वर्ल्ड गोवा डे 2025’चो सुवाळो व्हडा उमेदीन आयोजीत केला. अंदूं ह्या संवसारीक उपक्रमाचें 25 वें वर्स मनयतात. संवसारभरच्या गोंयकारांक तांची भास, संस्कृती आनी परंपरेच्या अभिमानान एकठांय हाडपी हो सुवाळो थारतलो.
‘वर्ल्ड गोवा डे’ हो दीस भारताच्या संविधानांत कोंकणी भाशेक अधिकृत मान्यताय मेळिल्ल्याची इतिहासीक घडणूक मनयतात. हाका लागून गोंयचो वळखीचो आत्मो कायम स्वरूपी सांबाळप जाता. गोवन कल्चरल सेंटर कुवेतचे अध्यक्ष कार्मो सँटोस हांच्या नेतृत्वा खाला अंदूची कार्यावळ अदीक विशेश थारतली. पयलेच फावट जिसीस हे संस्थेक वर्ल्ड गोवा डेचें संवसारीक पांवड्यार आयोजन करपाचो मान मेळ्ळा.
गोंयच्या कलाकारांची मैफल
गोंयचो लोकप्रिय बँड ‘Injunktion’, जाचें फुडारपण गायिका जिनिव्ह डिसोझा करता, खासा हे कार्यावळी खातीर कुवेताक दाखल जातली. फेली गोम्स आपले वेगळे शैलींत पुराय कार्यावळीक रंग हाडटले.
संवसारीक गोंयकारांचो मेळावो
कार्यावळींत गोंय तशेंच संवसारभरच्यान येवपी प्रतिनिधी वाटेकार जातले. कुवेतांतले प्रतिभावान गोंयकार टी-बुश हांणी केल्ल्या आकर्शक ऑडिओ-व्हिज्युअल सादरीकरणान हे कार्यावळीक एक वेगळेंपण पळोवपाक मेळटलें. ‘वर्ल्ड गोवा डे’चो उत्सव सकाळीं 10 वरांचेर 3- वांगडी फुटबॉल टाय-ब्रेकर्स सर्तींत सुरू जातलें. उपरांत दिसभर विवीध घरगुती आनी मैदानी उपक्रम, मनोरंजक स्टॉल्स आनी सगल्या पिरायेच्या गटां खातीर खेळ आयोजीत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
