कुळ्यां मुळाव्या भलायकी केंद्राचें बांदकाम चल्लां कांसवा गतीन

भांगरभूंय | प्रतिनिधी

फोंडें: कुळ्यां नवें मुळावें भलायकी केंद्र उबारपाचें काम फाटल्या 5-6 वर्सांच्यान चल्लां. कंत्राटदाराक वेळार रकम दिनाशिल्ल्यान, कोरोना म्हामारी आनी हेर कारणांक लागून मुळाव्या भलायकी केंद्राचें काम आडखळ्ळां. ह्या वाठारांतलें रेल्वे स्टेशन आनी दुदसागर घसघसो पळोवपाक व्हड संख्येन येवपी पर्यटकां सयत थळाव्या लोकांक हें मुळावें भलायकी केंद्र फायद्याचें थारतलें. हें मुळावें भलायकी केंद्र दुयेंतींचे सेवे खातीर बांदून बेगीन ताचें लोकार्पण करचें, अशी मागणी थळाव्या लोकांनी केल्या.

कुळ्यां मुळावें भलायकी केंद्र बांदपा खातीर 18 ऑक्टोबर 2019 ह्या दिसा बुन्यादी फातर बसयल्लो. पूण इमारत उबारपाच्या प्रत्यक्ष कामाची सुरवात 19 डिसेंबर 2020 ह्या दिसा जाली. ते उपरांत कोरोमा म्हामारीक लागून काम बंद दवरलें. भलायकी केंद्राची प्रत्यक्षांत पळोवणी केली तेन्ना आनीक 4- 5 म्हयने तरी ताचें लोकार्पण जावपाची शक्यताय नाशिल्ल्याचें दिसून आयलें.

कुळें, मोलें, शिगाव, बोळकर्णे आनी हेर वाठारांतल्या लोकांक मुळावें भलायकी केंद्र खूब गरजेचें आसा. ग्रामीण भलायकी केंद्राचो दर्जो आसतना सुमार 50- 60 दुयेंती सद्दां तपासणी करपा खातीर येताले. नवी इमारत बांदले उपरांत ते परस दुपेटीन दुयेंती तपासणी करपाक येवपाची शक्यताय आसा.

वाठारांत एकाद्या वेळार अपघात जालो जाल्यार जखमीक कुडचड्यार वा पिळये मुळाव्या भलायकी केंद्रांत व्हरतात. खूब खेपे जखमीक भलायकी केंद्रांत पावचे आदींच मरण येता. अनमोड घांटार लेलगीत अपघात जालो जाल्यार सुमार 35- 40 किलोमिटर अंतराचेर आशिल्ल्या पिळये मुळाव्या भलायकी केंद्रांत व्हरचें पडटा. खूब खेपे जखमीक भलायकी केंद्रांत पावचे आदींच मरण येता. हे खातीर कुळेंच्या मुळाव्या भलायकी केंद्राचें बेगीन लोकार्पण करपाची मागणी थळाव्या लोकांनी केल्या.

मुख्यमंत्र्यां कडेन चर्चा करतलों: पाऊसकार

कुळ्यां ग्रामीण भलायकी केंद्राची खुबूच गरज आसा. मात आडखळिल्ल्या कामाक लागून दुयेंतींक वेळार उपचार मेळनात, अश्यो कागाळी वाडल्यात. ग्रामीण भलायकी केंद्र सुरू करचे खातीर मुख्यमंत्री डॉ. प्रमोद सावंत हांची भेट घेवन चर्चा करतलों, अशें आदले बांदकाम मंत्री तशेंच गोंय साधन सुविधा मंडळाचे आदले अध्यक्ष दीपक पाऊसकार हांणी सांगलें.