भांगरभूंय | प्रतिनिधी
गोंय एससी, एसटी आयोगाची शिफारस
भांगरभूंय । प्रतिनिधी
पणजीः जी जमीन कूळ कसता ते जमनी वयल्यान तांकां भाटकार काडपाक शकना. तशेंच भाटकाराक ती जमीन विकपाची आसल्यार संबंदीत कुळांकूच विकची पडटली, अशी शिफारस गोंय एससी, एसटी आयोगान कुडणें- सांखळेच्या एका प्रकरणाचे सुनावणे उपरांत केल्या.
कुडणें- सांखळेचे कमलाकांत गणी गावडे हांणी अॅट्रोसिटी कायदो- 1989 प्रमाण साईदत्त बोरकार (सांखळी), गौरी सिनाय बोरकार (सांखळी), शांभवी सिनाय बोरकार (पणजी) आनी वंदना मोरजकार (हरवळे) हांचे आड आयोगांत कागाळ दाखल केल्ली. कुडणें- सांखळी वाठारांतली सर्वे नं. 180/20 आनी 180/24 तली जमीन विनायक सिनाय बोरकार ह्या भाटकारान 70 वर्सां आदीं कमलाकांत गावडे हांचो बापूय गणी गावडे हांकां दिल्ली. हे जमनीर गणी गावडे आनी कमलाकांत गावडे 70 वर्सां सावन काजू, माड, आंब्याची लागवड करतात. हे जमनीर गावडा समाजाचें देवूळ तशेंच मसुंडी आसा. साईदत्त बोरकार, गौरी सिनाय बोरकार, शांभवी सिनाय बोरकार आनी वंदना मोरजकार हे जमनीचें सपाटीकरण करून ती हेरांक विकपाच्या यत्नांत आशिल्ल्याचो दावो कमलाकांत गावडे हांणी आपले याचिकेंत केल्लो. गावडे हांणी याचिके वांगडा ते जी जमीन कसतात, ती जमीन भाड्यान दिल्ल्याच्यो पावत्यो कूळ डिक्लेरेशन अर्ज आनी जात प्रमाणत्रूय जोडिल्लें. ह्या सगळ्याची दखल घेवन प्रतिवाद्यांक हे जमनी वयल्यान कमलाकांत गावडे हांकां काडपाक मेळचो ना. झाडां मारून जमनीचें सपाटीकरण करपाक मेळचें ना. तशेंच संबंदीत जमीन हेरांक विकपाक मेळची ना, अशी शिफारस राज्य एससी, एसटी आयोगाचे अध्यक्ष दीपक करमळकार हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
