भांगरभूंय | प्रतिनिधी
कारापूर सर्वण पंचायतः प्लॉट विकसीत करपाक मात परवानगी
भांगरभूंय । प्रतिनिधी
दिवचलः कारापूर सर्वण पंचायत वाठारांतल्या नियोजीत मेगा प्रकल्पाक प्रत्यक्षात पंचायतीन ना हरकत दाखलो दिवंकूच ना. त्या प्रकल्पाची फायस सध्या आमचे कडेन येवंक ना. अशें तरेचें स्पश्टीकरण सरपंच आन सचिवान दिलें. मात प्लॉक विकसीत करचे खातीर पंचायती वतीन ना हरकत दाखलो दिल्ल्याचें ह्या वेळार ग्रामसभेंत स्पश्ट केलें.
मेगा प्रकल्पा वयल्यान ग्रामसभा तापपाचीं चिन्नां दिशिल्ल्यान व्हड प्रमाणांत पुलीस बंदोबस्त दवरिल्लो. महिला पुलीस लेगीत उपस्थीत आशिल्ले. हे ग्रामसभेक लोकांनी व्हड संख्येन गर्दी केल्ली. सरपंच तन्वी सावंत हांणी येवकार दिलो.
ग्रामसभेचे सुरवेक कावलां अड्डे, कोयराचो विलो, घाणयारें उदक, बेकायदो प्लॉट, उदक प्रकल्पा खातीर ना हरकत दाखलो हे विशय चर्चेक आयले.
कुळणांत येवपा आशिल्लो मेगा प्रकल्पाचेर प्रसार माध्यमांचेर खूब प्रमाणार चर्चा चालू आसा. मात ग्रामसभेंत ह्या प्रकल्पाक अजून कसलोच परवानो दिवंक नाशिल्ल्याचें पंचायती वतीन स्पश्ट केलें.
ग्रामसभेंत मिनरल वॉटर प्रकल्पाचो विशयाचेर खूब वेळ चर्चा जाली. विठ्ठलापूर वाठारांत ह्या प्रकल्पाक परवानगी दिल्या, ते विशींय नेटाची चर्चा जाली. स्थिती हाता भायर वता अशें दिसताच पुलिसांनी हस्तक्षेप केलो. प्रकल्पाची पळोवणी करची, अशी मागणी थळाव्या लोकांनी केली.
ग्रामसभेंत साबार विशयां वयल्यान खूब बोवाळ जालो, ताका लागून गोंदळाचें वातावरण निर्माण जालें. त्या वेळार मामलेदार प्रवीण गांवस हांणी हस्तक्षेप करून सगळ्यांनी शांत जावचें आनी एकेकल्यान मुद्दो मांडचो, असो उलो मारलो. गोंदळ केल्यार पुलिशेक आपोवचे पडटले, अशेंय तांणी स्पश्ट केलें. उपरांत बोवाळ उणो जालो.
ग्रामसभेंत सरपंच तन्वी संवात हांणी पंचायती खातीर राणे कुटुंबियांनी एमआरएफ शेड बांदचे खातीर आपली जमीन दिल्या. तशेंच पंचायत इमारती खातीर जमीन उपलब्ध करून दिल्ले खातीर विश्वजीत राणे आनी प्रतापसिंग राणे हांकां ह्या वेळा परबीं दिलीं. सरपंच तन्वी सावंत, उज्वला कवळेंकार, बिंदिया सावंत, बीबी आयशा माघोड, लक्ष्मण गुरव, योगेश पेडणेंकार, दामोदर गुरव, ज्ञानेश्वर बाले, सचीव महादेव नायक, तशेंच जिल्हो पंचायत वांगडी महेश सावंत हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
