कुल्लेचो वापर करपी रोहित पवारा आड भाजप आनी ‘पेटा’ ची कागाळ
भांगरभूंय | प्रतिनिधी
पुणे, खबरां संस्था : कर्जत- जामखेडचे आमदार रोहित पवार (राष्ट्रवादी, शरद पवार गट) हांणी म्हायुतीच्या मंत्र्यांचेर टिका करतना पत्रकार परिशदेंत आपले वांगडा जिवी कुल्ली हाडिल्ली. आतां हें प्रकरण खूब तापलां. हें कायद्याचें स्पश्ट उल्लंघन आसा असो आरोप करून भारतीय जनता पक्षान रोहित पवार हांचे आड वेंचणूक आयोगा कडेन कागाळ केल्या. पूण पवारान ही भाजपाची बौद्धिक दिवाळखोरी अशी जाप दिवन हे आरोप न्हयकारल्यात. ‘पीपल फॉर एथिकल ट्रीटमेंट ऑफ एनिमल्स’ म्हळ्यार पेटा हे संस्थेनूय वेंचणूक आयोगाच्या अधिकाऱ्यांक आनी राष्ट्रवादी काँग्रेस पक्षाच्या शरदचंद्र पवार गटाचे अध्यक्ष शरद पवार हांकांय पत्र बरयलां.
रोहित पवारान उखलिल्लें हें पावल पशु प्रतिबंध कायदो आनी महाराष्ट्र राज्य आदर्श आचारसंहितेचें उल्लंघन करता असो आरोप ‘पेटा’न केला. वेंचणूक अधिकाऱ्यांनी 24 मार्च 2014 दिसा जारी केल्ल्या सुचोवण्यांनी वेंचणुकांनी जनावरांच्या वापराचेर बंदी घाल्ली अशेंय तांणी म्हणलां. देखून आतां आमदार रोहित पवाराचे समस्या वाडल्यात.
भाजपाची कारवायेची मागणी
रोहित पवार हांची ही कृती जायत्या कायदे आनी नेमांचें संभाव्य उल्लंघन आसा असो दावो भाजपान पत्रांत केला. कुल्लेचें प्रकरण सरळ ह्या तरतुदी खाला येना तरी वेंचणुकेच्या प्रचारांत सरपटपी प्राण्यांचो वापर अनैतिक वागणूक मानूं येता. देखून ह्या पत्रांत वेंचणूक आयोगाक पुराय चवकशी करून रोहित पवारांचेर योग्य कारवाय करपाक सांगलां. वेंचणूक प्रक्रियेची एकात्मता तिगोवन दवरप आनी भौशीक सुरक्षे खातीर अशे दुरुपेग आनी धोके खंयचेच परिस्थितींत सोंसचे नात हाची खात्री करप गरजेचें, अशेंय भाजपान पत्रांत मत मांडलां.
रोहित पवारान कितें म्हणलें?
भाजपाच्या आरोपांक आमदार रोहित पवारान सोशल मिडिया पोस्टा वरवीं जाप दिल्या. तांणी म्हणलां, ‘दिसा उजवाडा राज्याची तिजोरी पोखरप्यांचें प्रतीक म्हणून पत्रकार परिशदेंत हांवें कुल्ली दाखयली म्हूण भाजपा खूबच रक्तबंबाळ जाल्ल्याचें दिसता.. आनी हाकाच लागून तांणी म्हजे आड थेट वेंचणूक आयोगाक कागाळ करून आपली बौद्धीक दिवाळखोरी दाखयल्या… खरें म्हणल्यार हांवें दाखयिल्ली कुल्ली हॉटेलांत जेवणा खातीर वापरपाची आशिल्ली. हांवें ती उपरांत न्हंयेंत सोडून तिचो जीव वाटायलो, पूण तेवटेन भाजपाची मात तडफड सुरू जाली… हाची कायदेशीर जाप हांव दितलों, पूण तुमी कितें म्हणटले, असल्या आबूज राजकी कुल्ल्यांक?’
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
