भांगरभूंय | प्रतिनिधी
नवी दिल्ली, खबरां संस्था: हिमाचल प्रदेशांत उटंगराचो पावस झडटा. कुलू जिल्ह्यांतल्या तीन सुवातांचेर, सैंज खोर्यांतलो जीवा व्हाळ, गडसा खोर्यांतलो शिलागड आनी बंजरच्या होरंगध हांगा ढग फुटी जाली. हाका लागून जायत्या सुवातांचेर हुंवाराची स्थिती निर्माण जाली. एक बापूय आनी धुवे सयत तीग जाण उदकांत व्हांवून गेलीं.
दुसरे कडेन बुधवारा सकाळीं उत्तराखंडांतल्या हल्द्वानी हांगा एक गाडी कानालांत पडली. ७ जाणां मदल्या ४ जाणांक मरण आयलें. हातूंत ३ दिसांच्या भुरग्याचोय आसपाव आसा. मंगळारा रातीं जम्मूक घोग्यांनी पडपी पावसाक लागून तावी न्हंय बरीच भरून व्हांवता. एक मनीस तातंत आडकलो. एसडीआरएफच्या जवानांनी शिडीचे मजतीन ताका वाटयलो.
गुजरातच्या सुरतांतलो चडसो भाग हुंवारांत सांपडला. खुबश्यो सोसायटी उदका पोंदाक गेल्ल्यो. ट्रॅक्टर वापरून लोकांक वाटयले. पर्वत पाटिया वाठारांत ५ फुटां परस चड उदक भरलें. हांगा एका जाण्ट्या मनशाक स्ट्रेचराचेर उदकांतल्यान भायर काडून ऍम्बुलन्सींत हॉस्पिटांत व्हेलो. मध्य प्रदेश, उत्तर प्रदेश आनी राजस्थानांतूय उटंगराच्या पावसाची शिटकावणी दिली.
तशेंच केरळांतल्या वायनाडांत पावसान नेट धरला. चूरलामल्ला हांगा हुंवाराची शिटकावणी दिल्या. फाटल्या वर्सा मुदक्काई, चूरलामल्ला, अट्टामाला आनी हेर वाठारांत पालसां कोसळून ३६९ लोकांक मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
