कुलदीप सेंगराक फांशीच दिवची

भांगरभूंय | प्रतिनिधी

उन्नाव बलात्कार प्रकरणांत सुप्रीम कोर्टान हायकोर्टाच्या निर्णयाक स्थगिती दिले उपरांत पिडीत बायल आनी तांच्या कुटुंबियांनी समाधान उक्तायलें. कारण सेंगराच्या जामीन अर्जाचेर स्थगिती आयिल्ल्यान सद्याचे परिस्थितींत ताच्या पळवाटांचेर ब्रेक लागला. पूण अजापाची गजाल म्हणल्यार राजकी फुडाऱ्यांच्या अशा हळशिकावण्या केसींचो निकाल कांसवाचे गतीन कित्याक चलता वा कित्याक लांबयतात हो मोटो आनी गंभीर प्रस्न आसा. कारण सर्वसामान्यांचे केसींत सरकार आनी कायदो तडकाफडकी निर्णय घेता आनी निर्णय लायता ही गजाल सगल्यांकूच खबर आसा. पूण आमी जाका लोकप्रतिनिधी, आमदार म्हणटात असो आदलो आमदार कुलदीप सिंग सेंगर हाच्या बलात्कार केस प्रकरणाक सुमार आठ वर्सां पुराय जाल्यांत. म्हणल्यार सुमार 2920 दीस जाले. तरी लेगीत पिडितेक अजून मेरेन योग्य न्याय मेळिल्लो ना ही दुर्दैवी आनी हुस्क्याची गजाल.
उन्नाव बलात्कार प्रकरण जर फास्ट ट्रॅक कोर्टाच्या माध्यमांतल्यान चलयिल्लें जाल्यार आतां मेरेन सेंगर फांसार हुमकळपाचो. सगल्यांकूच खबर आसा की सेंगर दोशी आसा म्हूण. पूण सरकारान जर जातीन फुडाकार घेतिल्लो जाल्यार सेंगराक केन्नाच फांशी जावपाची हेंवूय तितलेंच सत्य आसा. पूण सरकार लेगीत सेंगराक वाटावपाचो यत्न करीत आशिल्ल्याचें दिसून येता. सरकाराक हेंवूय लक्षांत दवरूंक जाय की एका बलात्कारी सेंगराक जर ताकतिकेन फांशी दीत जाल्यार देशांतल्या राजकी वर्तुळांत भुंयकांप जातलो आनी बलात्कार प्रकारणाचेर एक तरेचो ब्रेक लागतलो हेंवूय तितलेंच खरें आसा.
राजकी फुडाऱ्यांनी लक्षांत दवरूंक जाय की कांय लोक सत्तेच्या पड्ड्या फाटल्यान खूबशीं हळशिकावणी कृत्यां करीत आसतात. तेंच काम कुलदीप सेंगरान सत्तेंत आसतना 2017 वर्सा केलें. पूण आतांय उन्नाव बलात्कार प्रकरणांतल्या आरोप्यांचेर अजून मेरेन खर ख्यास्त जाल्ली ना, ही दुर्दैवी गजालूच म्हणचें पडटलें. देशांत खंयचेंय बलात्कार प्रकरण आसूं अशा केसीचो निकाल फास्ट ट्रॅक कोर्टाच्या माध्यमांतल्यान चलूंक जाय आनी हातूंत ताकतिकेन फांशीचे ख्यास्तीचें प्रावधान आसप गरजेचें आसा. कारण कुलदीप सेंगरा सारके अशे हजारांनी राजकी फुडारी आसात की आपल्या सत्तेचो, संपत्तीचो आनी अधिकाराचो गैरवापर करून हळशिकावणी कृत्यां करीत आसतात.
2017 च्या उन्नाव बलात्कार प्रकरणांत मोटो निर्णय घेतना सर्वोच्च न्यायालयान दिल्ली उच्च न्यायालयाच्या त्या आदेशाक स्थगिती दिली. जातूंत नेण्टे पिरायेचे चलयेचेर बलात्कार प्रकरण दोशी आनी भाजपांतल्यान धांवडावन घाल्लो कुलदीप सेंगर हाची जल्मठेपेची ख्यास्त स्थगीत केल्ली. नेण्टे पिरायेचे चलयेचेर बलात्कार करपी नराधम कुलदीप सेंगर हाचे केसीचो ताकतिकेन निर्णय लावन फांशीचे ख्यास्तीचीच मागणी मुखेलपणान करून सरकारा कडल्यान आनी हेर पुराय राजकी मळार जावंक जाय. आतां सरकारान वेळ काडिनासतना उन्नाव बलात्कार प्रकरणांतले ठोस पुरावे पळयत जाल्यार पिडितेक न्याय दिवपाच्या उद्देशान मुखार येवपाची गरज आसा. जेणे करून नराधम बलात्कारी कुलदीम सिंग सेंगर हाका जाता तितले बेगीन फांशीची ख्यास्त जातली. कारण कुलदीप सेंगराचें हें हळशिकावणें कृत्य पळयत जाल्यार सगल्याच मळार फांशीची ख्यास्तीची मागणी जायत आसा. ताका लागून सर्वोच्च न्यायालयाक म्हजी नमळायेची विनंती आसा की, उन्नाव बलात्कार प्रकरणाचो निकाल जाता तितले बेगीन लावन नराधम सेंगराक फांसार दिवचो. तेन्नाच पिडितेक योग्य न्याय मेळटलो आनी लोकशायेक नवी दिशा मेळटली.